Nis integrimi gradual i Policisë në sigurinë e Manastirit të Deçanit dhe Urës së Ibrit

Pas më shumë se dy dekadash, KFOR-i ka nisur ndryshimin e mënyrës së sigurisë në dy pika të rëndësishme në Kosovë. Policia e Kosovës po integrohet gradualisht në sigurinë e Manastirit të Deçanit, ndërsa KFOR-i ka nisur tërheqjen graduale të pranisë së përhershme nga Ura e Ibrit në Mitrovicë. Të dyja proceset, sipas KFOR-it, do të zhvillohen në mënyrë graduale

Misioni paqeruajtës i udhëhequr nga NATO ka nisur procesin e integrimit gradual të Policisë së Kosovës në sigurinë e Manastirit të Deçanit, ndërsa paralelisht ka filluar edhe tranzicionin gradual të pranisë së përhershme të trupave të tij nga Ura e Ibrit në Mitrovicë.

Sipas njoftimit nga KFOR-i, të dyja proceset do të zhvillohen gradualisht dhe në bazë të kushteve të sigurisë në terren, në koordinim të ngushtë me institucionet e Kosovës, Policinë e Kosovës dhe EULEX-in.

“Përkushtimi i KFOR-it ndaj sigurisë së Manastirit të Deçanit dhe sigurisë së të gjitha komuniteteve lokale është i palëkundur. Personeli ynë është i pozicionuar mirë për t’iu përgjigjur çdo zhvillimi përkatës, në përputhje me mandatin afatgjatë të KFOR-it të bazuar në OKB. KFOR-i mbetet reaguesi i parë për sigurinë e Manastirit të Deçanit”, thuhet nga KFOR-i.

Sa i përket Urës së Ibrit, që pas 27 vjetësh Policia e Kosovës po fillon të marrë përgjegjësinë për sigurinë në urën kryesore.

KFOR-i ka sqaruar se ky proces nuk nënkupton tërheqjen e tij nga Mitrovica apo veriu i Kosovës, pasi do të vazhdojë të ketë prani të dukshme në të dyja pjesët e qytetit dhe në veri të vendit.  

Edhe Arbëri 1 o. më parë Sveçla: Largimi gradual i KFOR-it nga Ura e Ibrit lajm i mirë, Kosova po forcohet

“Në përputhje me përmirësimin e situatës së sigurisë në Kosovë, ky është pjesë e procesit për optimizimin e pozicionimit të KFOR-it. Ky proces do të jetë gradual, i bazuar në kushtet në terren dhe do të koordinohet ngushtë me të gjithë akterët relevantë, përfshirë përfaqësuesit e institucioneve në Kosovë dhe të organizatave ndërkombëtare, si dhe përfaqësuesit e Policisë së Kosovës dhe Misionit të Bashkimit Evropian për Sundimin e Ligjit në Kosovë (EULEX)”.

Në njoftim thuhet gjithashtu se komandanti i misionit të KFOR-it vazhdon të jetë në kontakt të ngushtë me homologët e institucioneve të Kosovës, por edhe të Serbisë.

Sipas KFOR-it, personeli i tij është i pozicionuar në mënyrë të përshtatshme për t’iu përgjigjur çdo zhvillimi të mundshëm në aspektin e sigurisë. 

Ministri në detyrë i Punëve të Brendshme, Xhelal Sveçla, ka mirëpritur nisjen e procesit gradual të largimit të trupave të KFOR-it nga ura Kryesore e Mitrovicës. Ai ka deklaruar se, me përmirësimin e situatës së sigurisë, do të reduktohet edhe prania e Policisë së Kosovës në urën kryesore të Mitrovicës.

Ai tha se procesi do të vijojë në koordinim të ngushtë me KFOR-in, i cili deri tani ka pasur përgjegjësinë për sigurinë në këtë urë, ndërsa Policia e Kosovës po rrit kapacitetet e saj.

"Patjetër që ky është një lajm i mirë. Gjithë procesi do të vijojë në koordinim të ngushtë me KFOR-in, i cili deri tani ka pasur përgjegjësinë e sigurisë në këtë urë", tha Sveçla për RTK Live. "Po, sigurisht që me përmirësimin e sigurisë edhe vet prezenca e Policisë së Kosovës do të reduktohet. Është një proces afatshkurtër, i cili do të ofrojë garanci për të gjithë se hapja e urës do të jetë një e mirë për të gjithë, pa pasur ndikim negativ ndaj askujt. Do të vijë momenti kur hapat e ardhshëm edhe do të bëhen publik, edhe do të shihen ashtu siç po shihen sot. Dhe një gjë e cila ka qenë brengë, por edhe simbol i ndarjes për 27 vite do të jetë një kujtim".

Edhe Arbëri 4 o. më parë KFOR-i konfirmon largimin gradual nga Ura e Ibrit

Ai ka thënë se institucionet janë të angazhuara që procesi të përfundojë sa më mirë dhe ka paralajmëruar zhvillime të reja.

"Të gjithë jemi të angazhuar që ky proces të përfundojë sa më mirë që është e mundshme, shumë shpejt do të kemi lajme të tjera të mira", tha ai.

Ndërkohë, Lista Serbe, ka kundërshtuar tërheqjen apo çfarëdo zvogëlimi të pranisë së pjesëtarëve të KFOR-it në urën kryesore mbi lumin Ibër.

Në një komunikatë për media, kjo parti thekson se ka kërkuar takim urgjent me komandantin e KFOR-it, gjeneralmajor Ozkan Ulutash, për t’ia përcjellë shqetësimet e komunitetit serb në veri dhe për të kërkuar ndaljen e kësaj mase.

Lista Serbe argumentoi se, për shkak të situatës politike dhe të sigurisë, si dhe tensioneve që në të kaluarën kanë shoqëruar zonën e urës, “çdo vendim për praninë e forcave të sigurisë aty duhet të merret me kujdes”.

Ura mbi lumin Ibër ka qenë për vite një nga pikat më të ndjeshme të sigurisë në Mitrovicë dhe simbol i ndarjes së qytetit. Ajo aktualisht është e hapur vetëm për këmbësorë.  

Edhe Arbëri 6 o. më parë Policia e Kosovës fillon gradualisht të integrohet gradualisht në sigurinë e Manastirit të Deçanit

Kosova dhe Serbia ishin pajtuar për hapjen e urës për trafik në vitin 2014, në kuadër të dialogut për normalizimin e marrëdhënieve. Marrëveshja parashihte rivitalizimin e urës dhe largimin e të gjitha barrikadave të vendosura nga serbët lokalë.

Qeveria e Kosovës së fundmi ka ndërtuar edhe dy ura të tjera pranë urës kryesore, një për këmbësorë një për automjeteve.