Kurti i kërkon Sorensenit “të ketë mirënjohje më të madhe” për Kosovën
Photo: Driton Paçarada
Kryeministri në detyrë i Kosovës, Albin Kurti, ka dhënë detaje për “takimin e gjatë” me emisarin e Bashkimit Evropian për dialogun Kosovë–Serbi, Peter Sorensen, ku ka kërkuar më shumë mirënjohje për përpjekjet e Kosovës në integrimin e komunitetit serb.
Kurti theksoi se komuniteti serb në Kosovë gëzon të gjitha të drejtat kushtetuese, përfshirë përfaqësimin në Kuvend me ulëse të rezervuara dhe përdorimin e gjuhës serbe në të gjitha nivelet institucionale. Ai shtoi se që nga largimi i rreth 500 pjesëtarëve serbë nga Policia e Kosovës, janë përfshirë 199 kadetë serbë të rinj në kuadër të Policisë.
“Prej më shumë se dy vjetësh, shqiptarët dhe serbët punojnë bashkë në katër komunat veriore, pa asnjë incident. Kërkova që të ketë më shumë mirënjohje për Kosovën për këtë realitet”, ka thënë Kurti.
Kryeministri në detyrë theksoi se veprimet e qeverisë janë në funksion të integrimit të komunitetit serb dhe në përputhje me marrëveshjet ndërkombëtare, ndërsa kritikoi Serbinë për mungesën e reciprocitetit.
Ndërkaq, sipas një njoftimi për media nga Zyra e Kryeministrit, Kurti në takim ka kërkuar nga Sorenseni edhe reagim për arrestimet e kosovarëve në Serbi.
“Në anën tjetër, kryeministri ngriti shqetësimin e tij me emisarin Sørensen në lidhje me deklaratat e vazhdueshme kërcënuese të krerëve të Serbisë ndaj Kosovës dhe arrestimet arbitrate të qytetarëve të Republikës së Kosovës gjatë udhëtimit tranzit përmes Serbisë nga autoritetet serbe, ndaj të cilëve kërkoi reagim të zëshëm dhe dënues nga komuniteti ndërkombëtar”, thuhet në komunikatë.
Sorensen paralajmëron vonesa në dialog për shkak të situatës politike në Kosovë
Përfaqësuesi i Posaçëm i Bashkimit Evropian për Dialogun Kosovë-Serbi, Peter Sorensen, ka thënë se me presidenten Vjosa Osmani dhe kryeministrin Albin Kurti kanë biseduar lidhur me implementimin e marrëveshjeve të arritura nga dialogu Kosovë-Serbi.
Ai në një adresim për media, pas takimeve, ka deklaruar se për shkak të situatës aktuale politike në Kosovë gjërat mund të marrin më shumë kohë.
“Sapo pata takim me kryeministrin Kurti dhe presidenten Vjosa Osmani, jam këtu për shkak të mandatit tim, për të diskutuar se si ta implementojmë Marrëveshjen e Ohrit, sepse situata politike këtu nënkupton që gjërat mund të marrin më shumë kohë. Kështu që ky është një takim i rregullt. Jam i lumtur që jam këtu”, ka thënë ai.
Kosova nuk ka arritur të themelojë institucionet e reja, pavarësisht se zgjedhjet parlamentare janë mbajtur më 9 shkurt.
Seanca konstituive ka nisur më 15 prill. Procesi ka ngecur në zgjedhjen e kryetarit të Kuvendit, për të cilin LVV, në koalicion me Guxo dhe Alternativën, ka propozuar deputeten Albulena Haxhiu. Mirëpo, e njëjta, në gjashtë votime të hapura, nuk ka arritur të sigurojë 61 votat e nevojshme për t’u zgjedhur në këtë post.
Të premten, më 8 gusht, merr fund masa e përkohshme e vënë nga Gjykata Kushtetuese, me të cilën u është ndaluar deputetëve çfarëdo vendimi apo veprimi për konstituimin e Kuvendit.
VIDEO:
Pas Osmanit, Sorenseni pritet edhe nga Kurti
Peter Sorensen duke hyrë në objektin e Qeverisë
Photo: Driton Paçarada
Emisari i posaçëm i Bashkimit Evropian për dialogun Kosovë-Serbi, Peter Sorensen, është pritur në takim edhe nga kryeministri në detyrë, Albin Kurti, të martën në objektin e Qeverisë.
Sorenseni paraprakisht u takua me presidenten Vjosa Osmani.
Për herë të fundit, raundi i dialogut Kosovë – Serbi ishte mbajtur më 10 qershor. Pas takimit mes kryenegociatorëve, emisari i BE-së pati thënë se po bëheshin përgatitje për takim të nivelit të lartë.
Kosova dhe Serbia nuk kanë zhvilluar takim të nivelit të lartë që nga shtatori i vitit 2023, disa ditë para se një grup serbësh të armatosur, në krye me Milan Radoiçiqin, sulmuan Policinë e Kosovës në Banjskë të Zveçanit, duke lënë të vrarë rreshterin Afrim Bunjaku.
Osmani i ankohet Sorensenit për masat e BE-së, kërkon dialog të paanshëm
Photo: Driton Paçarada
Presidentja e Kosovës, Vjosa Osmani, në takim me përfaqësuesin e Posaçëm të Bashkimit Evropian për Dialogun Kosovë-Serbi, Peter Sørensen, ka kërkuar largimin e masave të Bashkimit Evropian, të cilat i ka quajtur të padrejta.
Ajo ka thënë se nga to, po preken më së shumti qytetarët e Republikës së Kosovës.
Siç bëhet e ditur nga një komunikatë për media, në kuadër të diskutimit, u trajtua edhe procesi i konstituimit të Kuvendit dhe institucioneve të tjera, si dhe rëndësia që këto institucione të funksionojnë në mënyrë demokratike për të avancuar objektivat e përbashkëta.
Komunikata sqaron se Osmani trajtoi edhe çështjen e arrestimeve arbitrare të qytetarëve të Kosovës nga ana e Serbisë duke kërkuar angazhim të bashkësisë ndërkombëtare në mënyrë që Serbia t’i ndalë këto veprime të paligjshme ndaj qytetarëve të Kosovës.
“Osmani theksoi se Kosova mbetet e përkushtuar ndaj rrugës së saj evropiane dhe thelbësisht e orientuar drejt reformave demokratike, të cilat duhet të shpërblehen me hapa konkret nga ana e Bashkimit Evropian. Tutje, Presidentja Osmani nënvizoi rëndësinë e integrimit të Kosovës në organizata ndërkombëtare, me theks të veçantë në Këshillin e Evropës, si dhe në organizata të tjera të rëndësishme”, thuhet në komunikatë.
Ndërlidhur me Dialogun, Osmani thuhet ta ketë theksuar rëndësinë e një procesi të drejtë e të paanshëm, duke përcaktuar objektiva të qarta, gjë që do të kontribuonte po ashtu në avancimin e paqes, stabilitetit dhe perspektivës evropiane të rajonit në tërësi.
Osmani takon Sorensenin
Presidentja e Kosovës, Vjosa Osmani e ka pritur në Presidencë të mërkurën paradite emisarin e posaçëm të BE-së për dialogun Kosovë-Serbi, Peter Sorensen.
Pas takimit me Osmanin, Sorenseni do ta takojë Kurtin.
VIDEO: