Organizatorët: Nuk na ka bashkuar partia – na ka bashkuar UÇK-ja

Mijëra qytetarë kanë protestuar për të katërtën natë radhazi në sheshin “Skënderbeu” në Prishtinë, kundër vendimit të Gjykatës Speciale, me të cilin janë dënuar katër udhëheqësit e UÇK-së: Hashim Thaçi, Jakup Krasniqi, Kadri Veseli e Rexhep Selimi.

Protesta ka nisur me betimin e UÇK-së, të përsëritur në kor nga pjesëmarrësit.

Një prej organizatorëve të protestave, Çlirim Haziri, ka thënë se protestat do të vazhdojnë deri në realizimin e kërkesës për drejtësi ndaj çlirimtarëve dhe paralajmëroi se protestat nuk do të ndalen.

Ai ka thënë se protestuesit nuk i ka bashkuar partia, por UÇK-ja.

E të shtunën, qindra mërgimtarë shqiptarë janë mbledhur edhe në sheshe të qendrave evropiane në tubime paqësore. Protesta u organizuan në Koln dhe Mynih të Gjermanisë, Cyrih të Zvicrës, Vjenë të Austrisë e edhe Kanada.