Mbyllja e QPS-ve ilegale shkakton reagime. Njohësit thonë se pritet dinamikë e re nga SHBA-ja

Vendimi për mbylljen e Qendrave për Punë Sociale në komunat veriore të Kosovës ka nxitur reagimin e Shteteve të Bashkuara. Ambasada amerikane ka shprehur shqetësimin e saj, duke e cilësuar këtë veprim si të papritur dhe të pakoordinuar. Edhe Bashkimi Evropian ka kërkuar që çështja të zgjidhet përmes dialogut me Serbinë. Ndërkohë, njohësit e politikës paralajmërojnë se administrata e re amerikane mund të sjellë një qasje të ndryshme ndaj Kosovës dhe zhvillimeve në rajon.

Në një reagim në rrjetin social “X”, Ambasada e SHBA-së është shprehur e shqetësuar, për siç kanë thënë, mbylljen e papritur edhe të pakoordinuar të qendrave të mirëqenies.

“Këto dhe veprime të ngjashme ndikojnë negativisht te mijëra qytetarë të Kosovës dhe rrezikojnë krijimin e pasojave të dëmshme për të ardhmen e Kosovës në Evropë dhe marrëdhëniet tona dypalëshe”, thuhet nga SHBA-ja.

Reagim ka pasur edhe nga Bashkimi Evropian.

Zyrtarë e BE-së kanë thënë se statusi i objekteve të Serbisë në veri të Kosovës, që ofrojnë shërbime sociale, duhet të zgjidhet në dialogun që e lehtëson blloku, duke i bërë thirrje Prishtinës që të mos i mbyllë këto struktura.

Edhe Arbëri 24 shk 2025 Gjermania kërkon alternativa para se të mbyllen institucionet ilegale që ofrojnë shërbime bazike

Më 8 shkurt, policia pati arrestuar katër zyrtarë të Qendrës për Punë Sociale në Zubin-Potok nën dyshimin për veprën penale: “cenim i përcaktuesve të votuesve”.

Pas kësaj, të premten e kësaj jave, me urdhër të Gjykatës Themelore në Mitrovicë, policia ka bastisur dhe mbyllur zyrat e tri qendrave për punë sociale, të cilat operonin ilegalisht në veri.

Sipas policisë, zyrtarë të këtyre qendrave dyshohet se kanë telefonuar qytetarë dhe nën formën e kërcënimit, i kanë detyruar apo udhëzuar se si të votojnë duke i kushtëzuar ndihmat sociale me votën e tyre në favor të një partie politike e cila ishte në garë për zgjedhjet parlamentare në Kosovë.

Por politologu Altin Gjeta, thotë se pavarësisht se në SHBA ka një administratë të re, reagimi i ambasadës nuk përbën qëndrim të ndryshëm nga qasja e viteve të fundit ndaj veprimeve të Qeverisë së Kosovës në veri.

Mirëpo, Gjeta pret ndryshim të dinamikës.

“Megjithatë, prej kohësh SHBA-ja po kërkon një strategji daljeje nga Kosova dhe Ballkani në tërësi. Kjo do të mund të realizohej me arritjen e një marrëveshjeje finale, gjithëpërfshirëse, dhe të obligueshme mes Kosovës dhe Serbisë. Por, mendoj se administrata Trump, e çliruar nga ngarkesat ideologjike të politikës tradicionale amerikane, do të synojë me shumë gjasë nëpërmjet Richard Grenell, arritjen e një kompromisi të imponuar mes Kosovës dhe Serbisë”, ka deklaruar Gjeta.

E njohësi i marrëdhënieve ndërkombëtare, Akri Çipa, thotë se skena politike në Kosovë, duhet ta kuptojë magnitudën e ndryshimeve ndërkombëtare dhe mbi të gjitha, qasjen që kërkon të ndërmarrë administrata e re amerikane.

“Më shume sesa trajtimi i situatave të tilla të natyrës sekondare, për liderët e vendit, ekziston një domosdoshmëri më e madhe. Kjo është vendosja dhe harmonizimi sa më i shpejtë dhe cilësor i komunikimeve me vendimmarrësit në Washington. Kjo ndodh sa mbi bazën e parimeve dhe vlerave të përbashkëta, aq edhe mbi kontekstin gjeopolitik dhe një strategji të qartë e pragmatike”, u shpreh Çipa.

Edhe Arbëri 23 shk 2025 Mbyllja e qendrave ilegale për punë sociale në veri, reagon SHBA-ja

Më 18 shkurt, ambasadori gjerman në Prishtinë, Jorn Rohde, ka thënë se Serbia ka ndërhyrë në zgjedhjet në Kosovë, duke kërkuar vota për Listën Serbe.

Edhe Nathalie Loiseau, shefe e misionit të Bashkimit Evropian për monitorimin e zgjedhjeve në Kosovë, pati thënë më 11 shkurt se Serbia kishte ndërhyrë në zgjedhje përmes trysnisë ndaj votuesve serbë në Kosovë.