Profesori Fadil Maloku, ka deklaruar se është absurde që të gjitha partitë politike po e konsiderojnë veten fituese në këto zgjedhje lokale, kur sipas tij, fituese e vërtetë është Lista Serbe.
Në emisionin “60 Minuta” në KTV, Maloku tha se fituesi i vetëm është Beogradi që me vetëm 5% të popullatës, fitoi më së shumti komuna.
“Fituesi i vërtetë është Lista Serbe apo të thjeshtohet edhe më tej fituesi i vërtetë është Beogradi, jo Prishtina. Absurdi i zgjedhjeve ani pse në nivel lokal është një paralajmërim për zgjedhjet që po vijnë së shpejti. Fakti se Lista Serbe ka më së shumti komuna dhe ajo çka është më e rëndësishmja është se ata përbëjnë 5% të qytetarëve por fitoi 10 komuna. Thënë ndryshe, 25 deri në 30% e territorit kontrollohet nga to”, deklaroi Maloku.
Tutje, Maloku tha se cilado parti që fiton me qeverisjen nacionale, do të duhej të merrej seriozisht me këtë çështje.
Sanksionet e BE-së, sipas Malokut nuk do të hiqen edhe me kalimin e pushtetit te kryetarët serbë në komunat veriore, pasi kushtëzimi i radhës sipas tij do të jetë asociacioni.
Maloku poashtu theksoi se në rast që me qeverinë do të jetë duke udhëhequr ish-opozita, ata do të bëjnë kompromise.
Edhe
Balotazhi që dehu "feudet" shqiptare, por forcoi Beogradin, e vërteta e hidhur e zgjedhjeve të 9 nëntorit!
“Do të zbuten masat por këto sanksione nuk do të tërhiqen pa kushtëzime. Kushtëzimi do të jetë te asociacioni. Varet kush është në qeveri. Nëse janë ‘esmenët’, ish-opozita kështu i quaj unë, ata me siguri do të bëjnë kompromise. Ndërkohë me Qeverinë Kurti, me shtrirjen e sovranitetit në pjesën veriore ku u aplikua sundimi dhe respektimi i ligjit me Kushtetutën e Kosovës, do të jetë interesante të dihet a do të vazhdoj kështu apo do të ndryshojë”, deklaroi Maloku.
Sipas tij, vendit i duhet një diplomaci më ofansive dhe sipas tij për këtë duhet kritikuar Qeveria Kurti sepse nuk është lobuar mjaftueshëm në aspektin ndërkombëtar.
Profesori Maloku tutje tha se Kosovën e presin procese të mëdha dhe sipas tij, kjo është një nga arsyet pse ka një bllokadë e zvarritje prej muajsh për formimin e institucioneve.
