Ambasadori i Shqipërisë mohon shpalljen “non-grata” të Gërvallës: Marrëdhëniet tona me Kosovën janë të qarta

Ambasadori i Shqipërisë në Kosovë, Petrit Malaj, ka mohuar raportimet se Shqipëria e ka shpallur “non-grata” ministren e Drejtësisë në Kosovë, Donika Gërvalla.

Të shtunën u pretendua se ministri i Jashtëm i Shqipërisë, Ferit Hoxha, ka urdhëruar ambasadorët e Shqipërisë në rajon që të mos krijohet asnjë mundësi që Gërvalla të ketë takim zyrtar në Shqipëri. Pretendimi ishte se porosia më së shumti i ishte drejtuar Malajt. Sipas pretendimeve, Gërvalla u shpall “non-grata” sepse kritikoi kryeministrin e Shqipërisë, Edi Rama, për opinionin e përbashkët me presidentin e Serbisë, Aleksandar Vuçiq.

E Malaj, në një përgjigje për KOHËN, ka mohuar gjithçka. Ai ka thënë se raportet Shqipëri-Kosovë janë të qarta.

“Ambasada nuk konfirmon asgjë të tillë. Në media qarkullojnë shpesh hamendësime nga më të ndryshmet, të cilat ne nuk i komentojmë më tej. Nuk ka asnjë vendim apo udhëzim të tillë. Marrëdhëniet tona me Kosovën dhe me qeverinë e saj janë të qarta, të forta dhe gjithëpërfshirëse, siç është theksuar së fundmi edhe nga Ministri Hoxha në bisedën e zhvilluar me Ministrin Konjufca”, ka thënë ai.

Më 19 mars, ministri i ri i Jashtëm i Shqipërisë, Ferit Hoxha, pati një bisedë telefonike me homologun nga Kosova, Glauk Konjufca. Aty Hoxha, sipas njoftimeve zyrtare, tha se Kosova është dhe do të mbetet prioritet i përhershëm i politikës së jashtme të Shqipërisë.

“Pata sot një bisedë shumë të ngrohtë dhe miqësore me Zëvendëskryeministrin e Parë dhe Ministrin e Punëve të Jashtme dhe Diasporës së Kosovës, Glauk Konjufca. Rikonfirmuam marrëdhënien tonë vëllazërore, lidhjen e veçantë e të patjetërsueshme mes dy vendeve tona, dhe ritheksova se #Kosova mbetet një prioritet i përhershëm dhe i padiskutueshëm i politikës sonë të jashtme. Ndamë angazhim për thellimin e mëtejshëm të #partneritetit strategjik dhe forcimin e bashkëpunimit në të gjitha fushat me interes të ndërsjellë”, pati thënë Hoxha.

Ai pati bërë të ditur po ashtu se me Konjufcën janë dakorduar për riaktivizimin e mekanizmave të përbashkët institucionalë dhe për avancimin e projekteve madhore me interes kombëtar.