Rrahmani i VV-së e Lushtaku i PDK-së kundër votimit të projektligjit për shëndetin riprodhues

Pas katër tentimeve, Kuvendi i Kosovës ka votuar në parim projektligjin për shëndet riprodhues dhe fertilizim të asistuar mjekësor.

Përveç kritikave në seancë nga disa deputetë të pushtetit e opozitës, kritika ka pasur edhe pas seancës.

Deputeti i Partisë Demokratike të Kosovës, Mergim Lushtaku ka thënë se votimi i një projektligji i tillë është në kundërshtim të plotë me ruajtjen e familjes së shëndoshë.

“Në seancën e sotme u votua projektligji për shëndet riprodhues dhe fertilizim të asistuar mjekësor, përmes të cilit mundësohet dhe legjitimohet që nënat të lindin fëmijë, e fëmija të rritet e të mos e di kush është babai i tij. Kjo për mendimin tim është në kundërshtim të plotë me ruajtjen e familjes së shëndoshë”, ka thënë ai në një postim në Facebook.

Lushtaku ka shtuar se “këta pushtetarë janë misionar të qëllimit për degjenerim e shkatërrim të vlerave tona fetare dhe kombëtare”.

Edhe Arbëri 26 sht 2024 Tre deputetë të pushtetit s’marrin pjesë në votim, në mungesë të kuorumit shtyhet seanca

Ndërkaq deputeti i Lëvizjes Vetëvendosje, Eman Rrahmani, ka thënë se do t’i paraqesin amendamentet që në votimin e dytë të largohen disa nene që sipas tij “cenojnë rëndë familjen, kulturën dhe traditën shqiptare”.

“Neni 8 - 9.Çdo burrë mbi 23 vjeç ka të drejtën e sterilizimit pa lejen e Komisionit për vlerësim mjekësor në institucionin shëndetësor përkatës. Neni 10 - 4. Fertilizimi i asistuar mjekësor është e drejtë edhe e gruas së pamartuar. Neni 15- 3.Të drejtë shfrytëzimi të FAM, ka edhe gruaja e pamartuar, mbi 18 vjeç, e cila sipas moshës dhe gjendjes së përgjithshme shëndetësore dhe sociale është e aftë për fertilizim dhe për përkujdesje prindërore”, ka shkruar ai.