Kusari-Lila: E rëndësishme që të ketë kompromis për zgjedhjen e presidentit

Ministrja e Industrisë, Tregtisë dhe Inovacionit, Mimoza Kusari-Lila, ka thënë se pas vendimit të gjykatës Kushtetuese, e cila i ka dhënë afat shtesë prej 34 ditësh Kuvendit për zgjedhjen e presidentit, është e rëndësishme që të ketë kompromis mes partive politike për zgjedhjen e presidentit.

“Është shumë e rëndësishme që e para Kuvendi të vazhdojë punën, e dyta që të ketë një kompromis dhe dakordim mes forcave politike për zgjedhjen e presidentit ... Derisa vazhdojnë negociatat për një person konsensual, besoj që mund të vazhdojmë me agjendën legjislative”, është shprehur ajo Kusari-lila në një intervistë në emisionin “60 Minuta” në KTV.

E pyetur nëse Glauk Konjufca do të jetë kandidati i Vetëvendosjes për president ajo ka thënë se është herët të flitet dhe se do të shihet mundësi e mbështetjes nga opozita.

“Kjo është shumë e hershme, do shihet si është disponimi dhe mundësia e mbështetjes nga opozita, besoj se duhet t’i kthehemi tavolinës dialogimit mes subjekteve. Kurti udhëheq diskutimin edhe me kryetarin e PDK, LDK. Mesa kemi parë nuk ka pasur diskutim me AAK-në, qëndrimi i tyre ka qenë paksa i çuditshëm sepse as nuk kanë qëndruar në sallë dhe kanë thënë se nuk do enë aty për të votuar. Duhet pasur një diskutim të gjerë dhe seriozitet se çka po rrezikohet me stabilitetin e vendit nëse shkohet në zgjedhje”, ka theksuar Kusari-Lila.

E shefja e Grupit Parlamentar të Lëvizjes Vetvendosje, Arbërie Nagavci, ka thënë se Kushtetuesja ka konfirmuar se dekreti i presidentes Vjosa Osmani për të shpërndarë Kuvendin ishte kundërkushtetues. Ajo ka thënë se ditët në vijim do të ketë angazhim nga të gjithë për zgjedhje të presidentit të ri.

“Veprimet në pozitat institucionale duhet të kryhen me përgjegjësi të lartë dhe pa inate personale. Ky moment duhet të shërbejë për reflektim dhe për angazhim të të zgjedhurve të popullit, në mënyrë që vendi të mos futet në një krizë të re dhe në një cikël të përsëritur zgjedhjesh. Gjatë ditëve në vijim, duhet të angazhohemi të gjithë për të zgjedhur Presidentin dhe për të shmangur edhe një palë zgjedhje, të cilat janë të panevojshme dhe të padrejta”, ka shkruar Nagavci në Facebook.

E këshilltari ligjor i kryeministrit të Kosovës, Albin Kurti, Blerim Sallahu, ka thënë se “ndihet krenar dhe shumë i lumtur” që u rrëzua dekreti dhe tha se ai ishte pjesë shumë e rëndësishme në rrëzimin e dekretit të cilin e ka cilësuar kundërkushtetues e “me tendenca të përmbysjes së rendit kushtetues”.