Kryeministri në detyrë dhe njëherësh kryetari i Lëvizjes Vetëvendosje, Albin Kurti, ka përshëndetur qëndrimin e kryetarit të Lidhjes Demokratike të Kosovës (LDK), Lumir Abdixhiku, për gatishmërinë e kësaj partie për të diskutuar rreth zgjedhjes së një presidenti konsensual. Megjithatë, Kurti ka thënë se LDK-ja është dashur të hyjë në bashkëqeverisje me Vetëvendosjen. Ai u ka bërë thirrje edhe Partisë Demokratike të Kosovës (PDK) dhe Aleancës që të ulen në një tryezë për të gjetur një figurë unifikuese për president, duke theksuar se presidenti nuk mund të jetë vetëm i VV-së dhe LDK-së.
Kurti ka thënë se e ka përcjellë mbrëmë deklaratën e Abdixhikut, i cili ka bërë të ditur se LDK-ja do të qëndrojë në opozitë, por është e gatshme të diskutojë për emër konsensual për president.
“E ndjeka mbrëmë qëndrimin e deklaratën publike të mikut tim Lumir Abdixhiku, i cili tha se LDK-ja do të qëndrojë në opozitë. Besoj që LDK-ja është dashur të hy në bashkëqeverisje, të kemi marrëveshje politike. Marrëveshja nuk është e thënë të jetë identike me rezultatin e zgjedhjeve, 53 me 18 deputetë, por edhe deformim i rezultatit nuk mund të jetë. Me 18 deputetë ta marrësh kryetarin e Kuvendit nuk është pak”, ka thënë Kurti të premten pas diplomit të 100 kadetëve në Shërbimin Korrektues.
Kurti ka dhënë detaje mbi diskutimet me LDK-në dhe ofertën për bashkëqeverisje.
“Kur e kemi parë që nuk janë të interesuar për kryetarin e Kuvendit, oferta jonë qysh në pranverë është ripërsëritur tani: Nëse VV-ja do ta kishte kandidatin për president e që ishte Glauk Konjufca, atëherë LDK-ja ta marrë zëvendëskryeministrin dhe katër ministri. Nëse kandidati për president është konsensual, atëherë ta marrë zëvendëskryeministrin dhe tri ministri. Sepse VV-ja po heq dorë nga presidenti. Besoj që oferta për kryeparlamentarin dhe për bashkëqeverisje, ku kryetari i LDK-së, Lumir Abdixhiku, ta zëmë do të bëhej zëvendësi im nuk është pak, nuk do të ishte pak edhe sikur të ishte rezultati më i ngushtë e lërë me që ishte 53 me 18”, deklaroi ai.
Edhe
Kurti: Pashë vullnetin e LDK-së që vendit t'i sjellim një president të ri
Kryeministri në detyrë e përshëndeti qëndrimin e Abdixhikut për president konsensual, por kërkoi edhe përfshirjen e PDK-së dhe Aleancës.
“E përshëndes thirrjen e Abdixhikut (për gatishmërinë për diskutim për president konsensual v.j.), por të jenë edhe partitë e tjera. Presidenti të jetë gjithëpërfshirës, të mos jetë vetëm VV-ja e LDK-ja”, deklaroi Kurti.
Ai bëri të ditur se mbrëmë, pas deklarimit të Abdixhikut, u ka shkruar kryetarëve të PDK-së, LDK-së dhe Aleancës, me kërkesën që të takohen sa më shpejt dhe të diskutojnë për zgjedhjen e presidentit e të flasin për emra konkretë, duke potencuar se ka dhjetëra të tillë.
“I kam shkruar të tre kryetarëve mbrëmë me këtë ide që sa më parë të takohemi dhe të merremi vesh për presidentin. Duhet të takohemi, njëmend të flasim për karakteristikat e figurës presidenciale, por për besë duhet të fillojmë të flasim edhe me emra, sepse po humbim shumë kohë. A më së shumti humbim kohë duke shkuar në zgjedhje. Unë mendoj që ka me dhjetëra të tillë në shoqërinë tonë, në univeristetet tona, në akademinë tonë, në jetën politike. Ata që kanë kontribuar në rezistencë paqësore, ata që kanë kontribuar në luftë çlirimtare, ata që kanë kontribuar në shtetndërtim demokratik. Kemi me dhjetëra figura që mund të jenë President”, ka thënë Kurti.
Gjatë ditës së sotme, nga salla e Kuvendit, kryetari i PDK-së, Bedri Hamza, deklaroi se pa u kthyer procesi i formimit të institucioneve në binarët kushtetues, Kurti s'ka kredibilitet të hapë tema madhore shtetërore.
Edhe
Ndryshimi i qëndrimit të LDK-së “hesht” Vetëvendosjen
Ndërkohë, Aleanca po insiston se pa u plotësuar gjashtë kushtet e saj, nuk do të hyjë në asnjë lloj negociate.
Legjislatura e 11-të e Kuvendit ka mbetur pa u konsistuar pasi seanca që u thirr më 6 gusht nuk arriti të përfundojë në dy tentativat e deritanishme. Kryetari i VV-së, Albin Kurti, kërkoi kohë shtesë për diskutime rreth çështjes së presidentit. Nga procesi i konstituimit kanë mbetur të votohen kryetari dhe nënkryetarët e Kuvendit.
