Politologu Melazim Koci ka deklaruar se deri në këtë fazë, Lëvizja Vetëvendosje nuk ka dhënë asnjë sinjal të qartë mbështetjeje për Vjosa Osmanin si kandidate për presidente, duke u pozicionuar, sipas tij, në një “zonë gri”.
Të enjten në “Interaktiv” të KTV-së, Koci ka thënë se ndonëse në një pjesë të opinionit publik dhe te simpatizantët e Vetëvendosjes është supozuar se Osmani do të ishte favoritja për postin e presidentes, deri më tani nuk ka pasur deklarime të qarta nga zyrtarët e kësaj partie.
“Një fazë e krizës është tejkaluar. Nuk ka më rrezik nga mbetja pa buxhetin nga bllokada financiare. Tani kemi fazën e dytë – zgjedhjen e presidentit/es – nuk jam shumë optimist për faktin që nuk ka ende në horizont as elemente të një konsensusi, deri më tani as që e kanë biseduar. E dyta – është supozuar te një pjesë, sidomos te simpatizantët e Vetëvendosjes, se favoritja do të duhej të ishte znj.Osmani, por deri në këto momente, asnjë zyrtar i VV-së, përfshirë edhe z.Kurti, asnjë sinjal që e mbështesin znj,Osmani. Nuk e kundërshtojnë. Gjenden në zonën gri, në pozicion neutral”, ka thënë Koci.
Sipas tij, mungesa e sinjaleve të qarta vlen edhe për opozitën, nga ku nuk sheh gatishmëri për ta mbështetur Osmanin për këtë post.
Koci ka komentuar edhe veprimin e fundit të LDK-së, e cila nuk mori pjesë në votim të Rezolutës për Specialen, duke e cilësuar si të gabuar në këtë moment.
“Mendoj se nuk ishte e qëlluar nga LDK-ja në këtë moment, askush nuk e përjashton atë që ata kërkuar, por mendoj se momenti nuk ishte në kontekstin e zhvillimeve. Atë çka e kërkuan ata mbetet, nuk ua mohon askush atë kërkesë nëse nuk futet në rezolutë. Nuk ishte e qëlluar, unë mendoj se gabuan sepse në këtë moment, nuk m’u duk e qëlluar, pa e përjashtuar se mund të kenë të drejtë në përmbajtjen e kërkesës, por në këtë moment dhe në atë rezolutë nuk m’u duk e qëlluar”, është shprehur ai.