Organizata Demokraci Plus (D+) ka kërkuar nga Ministria e Mjedisit dhe Planifikimit Hapësinor (MMPH) të anulojë tenderin me titull “Konsulentë Ligjorë për mbështetjen e hartimit të legjislacionit dytësor për Ligjin e Banimit Social dhe të Përballueshëm”, me vlerë të parashikuar prej 50 mijë euro.
Sipas D+, kjo procedurë është inicuar në kundërshtim me Rregulloren nr. 002/2024 për Prokurim Publik, konkretisht me nenin 57.2, i cili përcakton se konsulentë të jashtëm mund të angazhohen vetëm për shërbime që nuk mund të mbulohen përmes procedurave të rregullta të rekrutimit sipas Ligjit për Zyrtarët Publikë.
Organizata ka theksuar se hartimi i akteve nënligjore është përgjegjësi e vetë ministrisë, sipas Rregullores për Punën e Qeverisë, dhe kontraktimi i një operatori ekonomik për këtë qëllim bie ndesh me praktikat institucionale dhe ligjore në Kosovë.
“Ky veprim rrezikon integritetin e procesit të hartimit të legjislacionit dhe cenon përgjegjësinë institucionale të ministrisë”, thuhet në reagim.