Katër organizata të shoqërisë civile kanë shprehur shqetësimin për situatën e krijuar në veri të Kosovës.
Në një deklaratë dërguar mediave ato kanë kërkuar që stabiliteti, paqja dhe siguria në veriun e Kosovës të jenë udhërrëfyesi kryesor për të gjitha palët e përfshira.
“Si organizata jo-qeveritare, kërkojmë që stabiliteti, paqja dhe siguria në veriun e Kosovës të jenë udhërrëfyesi kryesor për të gjitha palët e përfshira. Të gjitha mosmarrëveshjet duhet të zgjidhen përmes dialogut, përderisa dhuna dhe veprimet e njëanshme duhet të ndërpriten menjëherë”, thuhet në deklaratë.
Tutje thuhet se ata besojnë që promovimi dhe mbrojtja e paqes dhe të drejtave të njeriut për të gjithë qytetarët, e sidomos për grupet e margjinalizuara në Kosovë, nuk kanë alternativë dhe duhet të jenë gjithmonë prioritet i çdo procesi vendimmarrës. “Dhuna ndaj qytetarëve, autoriteteve publike, pjesëtarëve të forcave ndërkombëtare të sigurisë si dhe mediave është shkelje e rëndë e të drejtave të njeriut, rendit dhe sigurisë në Kosovë, dhe për më shumë e pengon procesin e paqes dhe pajtimit”, thuhet në deklaratë.
Sipas tyre kjo situatë po ndikon edhe në marrëdhëniet ndëretnike.
“Nga puna jonë në terren me qytetarët e komunitetit serb dhe të gjitha komuniteteve tjera që jetojnë në Kosovë, po e vërejmë ndikimin negativ të veprimeve të papërgjegjshme të akterëve shtetëror si në Prishtinë ashtu edhe në Beograd, duke ndikuar drejtpërdrejt në marrëdhëniet më të gjera ndëretnike në Kosovë. Pasojat e veprimeve të ndërmarra në veri të Kosovës prekin të gjithë qytetarët e Kosovës, prandaj situata duhet të trajtohet në mënyrë paqësore, të kujdesshme dhe të qetë”, thuhet në komunikatë.
Sipas tyre mirëqenia e të gjithë qytetarëve duhet të jetë udhërrëfyesi dhe pikënisja e çdo vendimmarrjeje nga institucionet publike. “Shoqëria civile dënon çdo provokim, kërcënim apo frikësim nga çdo palë që vetëm e përkeqëson situatën dhe nuk sjellë rezultate konkrete në përfaqësim dhe respektim më të madh të të drejtave të komuniteteve që jetojnë në Kosovë. Shoqëria civile i bën thirrje Qeverisë së Kosovës dhe përfaqësuesve serbë në Kosovë që të ndërpresin veprimet e njëanshme dhe të bëjnë kompromiset e duhura për të tejkaluar gjendjen e krijuar në veri të Kosovës në koordinim të plotë me komunitetin ndërkombëtar dhe palët e tjera duke u fokusuar ne dialogun në mes të Kosovës dhe Serbisë”, thuhet në deklaratë.
Edhe
Shoqëria civile në Kosovë dhe Serbi bën thirrje për normalizim të marrëdhënieve
Ato gjithashtu u kanë bërë thirrje autoriteteve në Serbi që të ndalojnë retorikën e tyre luftë-nxitëse në Kosovë dhe të tregohen konstruktive në arritjen e një zgjidhjeje paqësore përmes dialogut të ndërmjetësuar nga Bashkimi Evropian.
“Paqja dhe siguria janë gjithmonë zgjidhja dhe institucionet në Kosovë duhet të punojnë menjëherë drejt uljes së tensionit në veri dhe arritjes së një zgjidhje e cila do të ndihmonte në integrimin më të madh të komunitetit serb në Kosovë”, thuhet në deklaratë.
Komunikata është nënshkruar nga Nisma e të Rinjve për të Drejtat e Njeriut – Kosovë, Integra, Instituti i Kosovës për Drejtësi dhe Qendra Kosovare për Studime Gjinore.
