Kabashi: Fadil Gashi i kishte thënë Thaçit se i bindej vetëm Rugovës

Ka përmbyllur dëshminë në Hagë ish-pjesëtari i UÇK-së, Shefqet Kabashi. Ai tha se në fshatin Sferkë të Klinës ka dëgjuar që ish-pjesëtari i UÇK-së, Fadil Gashi, i kishte thënë Hashim Thaçit se i bindet vetëm presidentit Ibrahim Rugova. Sipas tij, në këtë kohë kishte marrë urdhër për ta vrarë Gashin

Në ditën e dytë të dëshmisë në procesin gjyqësor ndaj ish-udhëheqësve të UÇK-së, Shefqet Kabashi tha se ka dëgjuar që ish-pjesëtari i UÇK-së, Fadil Gashi, i kishte thënë Hashim Thaçit se i bindej vetëm presidentit Ibrahim Rugova.

Një anëtar i trupit gjykues e pyeti Kabashin rreth deklarimit të tij për urdhrin që ta vriste Gashin.

“E kam ende të paqartë këtë – në draftdeklaratën tuaj ju thoni: ‘Më vonë dëgjova se para sesa të urdhërohesha që ta vrisja, Fadil Gashi i kishte thënë Hashim Thaçit se do të merrte urdhra vetëm nga presidenti Rugova’ dhe aluduat te kjo edhe sot. E kam të paqartë se si dëgjuat se Fadil Gashi i tha Hashim Thaçit që do të merrte urdhra vetëm nga presidenti Rugova”, e ka pyetur atë Fergal Gaynor, anëtar i Trupit Gjykues.

“Siç e thashë, nga njerëzit përreth. Shkoja në Sferkë prej ku ishte Fadil Gashi, nga ushtarët, njerëzit përreth”, është përgjigjur dëshmitari Kabashi.

Shumica e kësaj seance u shoqërua me probleme me transmetim.

Të martën, kur Specialja, po ashtu, pati probleme me transmetim, Kabashi theksoi se nga eprori i tij Alush Agushi mori urdhër që krahas Gashit ta vriste edhe Dinë Berishën, që po kështu ishte pjesëtar i UÇK-së. Krahas tyre, edhe deputetin e Kuvendit, që u zgjodh gjatë luftës, Rrok Berisha.

Dëshmitari Kabashi tha se nuk i ka përfillur urdhrat për vrasje dhe se Berishës i çoi mesazh se ishte në rrezik.

Edhe LAJMET E MBRËMJES 14 nën 2023 Kabashi thotë se e ka parë Rexhep Selimin në Jabllanicë, pasi mori urdhër për të kryer tri vrasje

“Në atë kohë punët ishin ndryshe. Jeta të ikte për një çast. Ishin kohë shumë të rrezikshme. Ajo që thashë unë ishte e vërtetë. A i thashë që je në rrezik apo që kam urdhër: jo nuk i thashë kam një urdhër për të të vrarë. Dërgova kushëririn. I thashë ta paralajmërojë e edhe kjo nuk ishte e lehtë ta bëje, sepse po ta dërgoje dikë e ta paralajmëroje se rrezikohet me jetë, dhe po të merrej vesh siç qe rasti i Rrok Berishës, rrezikoheshe vetë dhe besoj që e dini më mirë se unë këtë gjë”, ka thënë ai.

Sipas Zyrës së Prokurorit të Specializuar, më 1 shtator të ’98-tës, Hashim Thaçi dhe Rexhep Selimi me pjesëtarë të tjerë të Shtabit të Përgjithshëm të UÇK-së u mblodhën në Sferkë të Klinës, ku komandanti i Policisë Ushtarake, Dinë Berisha, tha se e përkrahte linjën institucionale të qeverisë së LDK-së në ekzil. Sipas kësaj dosjeje, Thaçi deklaroi se ata që s’e njohin Shtabin e Përgjithshëm janë kriminelë dhe se do të luftojnë kundër tyre.

Dëshmitari Kabashi e ka përmbyllur dëshminë, e pas tij ka vazhduar Sadik Halitjaha, ish-zëvendëskomandant i Zonës Operative të UÇK-së për Pashtrikun.