Izraeli dëshiron t’i avancojë marrëdhëniet me Kosovën

Ministri izraelit për Bashkëpunim Regjional, Esawi Frej, ka thënë se Izraeli dëshiron t’i avancojë marrëdhëniet me shtetin e Kosovës.

Në një konferencë për media, të martën, ai ka thënë se ka ardhur në Kosovë që të tregojë se Izraeli i ka duart e hapura për bashkëpunim.

“Ne duam që të avancojmë marrëdhëniet dhe t’i thellojmë ato. Ne kemi shumë gjëra të përbashkëta. Ne kuptojmë çmimin e konfliktit dhe vështirësitë për pavarësi. Jam këtu në Kosovë për herë të parë dhe ky është vetëm fillimi”, ka thënë ai.

Ministri i Administrimit të Pushtetit Lokal, Elbert Krasniqi, ka thënë se po përpiqen të gjejnë mundësi për bashkëpunim dhe investim në fushat e bujqësisë e sigurisë.

Më herët, delegacioni izraelit ka bërë homazhe të pllaka memoriale në nderim të viktimave të Holokaustit.