Hoti: Integrimi është politika jonë e përditshme

Për kryeministrin Avdullah Hoti, integrimi është politikë e tij e përditshme dhe e qeverisë që udhëheq.

Hoti të mërkurën, së bashku me zv.kryeministrin Driton Selmanaj, mori pjesë në tryezën konsultative me organizata të Shoqërisë Civile për prioritetet e Agjendës së Reformave Evropiane (ERA 2). Pjesëmarrës ishte edhe ambasadori i BE-së në Kosovë, Tomas Szunyog.

“Integrimet evropiane, politikat evropiane, janë politika e jonë e përditshme. Tash së fundmi është finalizuar rregullorja për funksionimin e zyrës për Integrimeve Evropiane. I kemi të qarta sfidat, që janë konfirmuar edhe në Raportin e Punës, po punojmë për adresimin e këtyre sfidave”, ka thënë Hoti.

E zv.kryeministri Selmanaj ka thënë se prioritetet janë ndarë në tri shtylla.

"Këto prioritete janë negociuar me Komisionin Evropian për disa muaj. Era 2 ka për qëllim që të shtyjë përpara implementimin e agjendës evropiane. Gjatë përgaditjes së ERA 2, prioritetet e kësaj agjende janë ndarë në 3 shtylla dhe duhet të implementohen deri në fund të vitit 2022. Shtylla e parë: Qeverisja e mirë dhe sundimi i ligjit, shtylla e dytë, Konkurrueshmëria, klima e investimeve dhe e treta ka të bëjë me arsimin dhe shëndetësinë”, ka thënë ai.

Për këtë plan të veprimit, Selmanaj ftoi shoqërinë civile që të ofrojë përkrahjen dhe ndihmën.

Edhe Arbëri 28 tet 2020 Selmanaj emërohet përgjegjës për procesin integrues

Ambasadori i BE-së në Kosovë, Tomas Szunyog, kërkoi nga institucionet kosovare që fokus ta kenë implementimin e Agjendës Evropiane të Reformave.

"Fokusi duhet të jetë në përmbushjen e ERA 2 ku presim që shoqëria civile të luajë rol kyç. Ne presim reforma konkrete dhe solide që përcaktohen me ERA 2. Pres që të ecet tutje me procesin e reformatizimit", tha Szunyog.