Gashi: Raporti i DASH-it, udhërrëfyes për Kosovën

Njohësi i marrëdhënieve ndërkombëtare, Drilon Gashi, deklaroi se raporti për Kosovën i Departamentit Amerikan të Shtetit (DASH), është udhërrëfyes për lëvizjen përpara të vendit në fushën e të drejtave të njeriut.

Ai deklaroi të mërkurën të Interaktiv të KTV-së, se ky raport e tregon nivelin e respektimit të të drejtave të njeriut dhe zhvillimin e demokracisë.

“Raporti vlerëson partnerët e SHBA-së nëpër botë sa janë të zhvilluar dhe në cilat fusha po ndikon SHBA-ja që ato shtete të zhvillohen. Në vija të trasha, është i ngjashëm me atë që shohim vit për vit. Në Kosovë kemi pasur ndryshim të madh, një parti që s’ka qenë më parë në pushtet dhe një presidente e re”, deklaroi Gashi.

Ai tha se raportet mes SHBA-së dhe Kosovës vazhdojnë të jenë të shkëlqyera dhe se të dyja janë futur në diskutimet e përditshme.

“Kosova është një demokraci e zhvilluar, kur kemi parasysh sa afër ishte lufta, mirëpo besoj se porositë që thuhen në raport, nuk do të përfundojnë aty”, tha Gashi.

Njohësi i marrëdhënieve ndërkombëtare theksoi se Kosova ka një media të lirë dhe si pushtet i katërt e luan rolin e saj.