Faton Peci akuzon Bedri Hamzën se po i keqpërdor taksat e qytetarëve

Kryetari i zgjedhur i Mitrovicës së Jugut, Faton Peci, ka akuzuar pushtetin aktual të kësaj komune se po abuzon me taksat e qytetarëve. Sipas Pecit, qeverisja e Bedri Hamzës iu ka dhënë të holla portaleve lokale, e gjithashtu po jep leje ndërtimi e mbindërtimi gjatë kësaj periudhe tranzicioni.

“Bedri Hamza, urime posti i Kryetarit të PDK-së. E lutja ime publike për ty është kjo: lëri manovrat me abuzime financiare në komunë, për portale me parat e qytetarëve të Mitrovicës. Në këtë periudhë tranzicioni, administratës komunale i bëj thirrje publike: lërini manovrat me subvencione e leje ndërtimore e mbindertimi. Leri nderhyrjet ne protokollin e arkives dhe manipulimin me data. Nuk keni legjitimitet e as legalitet”, ka shkruar Peci në rrjetin e tij social Facebook.

Tutje Peci ka thënë se “çdo vendim i tillë nga periudha e fillimit të fushatës do të rishikohet, dhe portalet lokale le të përgatiten fort për të bërë opozitë për herë të parë, sepse asnjë cent nuk do ta marrin nga buxheti i komunës për 4 vitet e ardhshme”.