Familjarë të viktimave në Podujevë e quajnë vrasje për herë të dytë lirimin e Shollajes

Ndonëse kanë kaluar 20 vjet, Avdi Maqastena, kujtimin për babanë e ka ende të freskët.

Maqastena e humbi babanë në masakrën e vitit 1999, në Podujevë, raporton KTV.

Dhimbja për humbjen e tij thotë se iu shtua kur dëgjoi lajmin për lirimin parakohshëm të Miodrag Shollajas.

Ai shton se dënimi për të ishte i padrejtë, e lirimi i kriminelëve serbë po i vret për së dyti familjet kosovare.

Për shoqatat e viktimave dhe të zhdukurve në luftë, lirimi i parakohshëm i dy serbëve nuk është befasi. Ata kërkojnë reagim nga shteti kosovar dhe ndërkombëtarët.

Miodrag Shollaja, ish-pjesëtar i njësisë “Shkorpionët”, ishte dënuar nga gjykata serbe me 15 vjet burgim për krime lufte gjatë vitit 1999 në Podujevë.

Edhe Arbëri 16 dhj 2022 Bogujevci pas arrestimit për drogë të kriminelit serb që ia masakroi familjen: Jemi larg drejtësisë

Nga po e njëjta gjykatë, pa kryer dënimin e plotë u lirua edhe Sasha Cvjetan, që në këtë qytet masakroi 14 civilë, në mesin e tyre edhe fëmijë.

Ndaj lirimit të tyre ka reaguar edhe familja Bogujevci, e cila u ka bërë thirrje institucioneve kosovare që t’i trajtojnë me seriozitet viktimat e luftës dhe të kërkojnë drejtësi për to.

Një reagim e ka bërë edhe kryetari i Kuvendit, Kadri Veseli, vetëm në Facebook, duke e ka quajtur akt të turpshëm lirimin e parakohshëm të këtyre dy serbëve të dënuar për krime lufte.