Edhe sivjet, nxënësit e shkollave të mesme në Luginë pa libra shqip

1 mijë e 607 nxënës shqiptarë të shkollave të mesme në Serbi, edhe këtë vit kanë nisur mësimin pa u pajisur me libra në gjuhën e tyre amtare.

Për vijuesit e shkollave fillore në Luginë të Preshevës, çështja e furnizimit me libra u pat zgjidhur më 2021. E për ata të shkollave të mesme, kryetari i Lëvizjes së Progresit Demokratik, Shqiprim Musliu, thotë se mungesat vazhdojnë e për pasojë, nxënësit detyrohen të mbështeten te shënimet e mësimdhënësve.

“Me vite të tana në shkollat shqipe, kryesisht në ato të mesmet nuk vijohet mësimi me tekstet e gjuhës shqipe. Mësimdhënësi shpjegon, nxënësi merr shpjegime dhe kështu vijon”, ka thënë Musliu.

Shqetësim për mungesën e librave në shqip ka shprehur edhe ish-kryetari i Këshillit Kombëtar Shqiptar, Ragmi Mustafi.

“Shkolla nuk është sallë politike. Nuk është fushë pazari. Nuk është plaçkë elektorale. Shkolla është tempulli i dijes. Ai është vendi ku fëmijët mësojnë barazinë, drejtësinë, lirinë. Por kur librat mungojnë vetëm për nxënësit shqiptarë, atëherë arsimi shndërrohet në mjet diskriminimi”, ka thënë Mustafi.

E Musliu thekson se mungesa ka edhe në shkollat fillore, kryesisht të librave për lëndët mbi kulturën e identitetin kombëtar shqiptar.

“Te tekstet shkollore që janë historia dhe te gjeografia ku preket identiteti

ynë kombëtar Serbia nuk ka lejuar që të përkthehen tekstet e shkollës fillore, ku është e qartë se në ato tekste shkollore është himni kombëtar shqiptar dhe në të njëjtën kohë te gjeografia figuron që territori i Republikës së Kosovës është shtet i pavarur dhe sovran. Kjo është Serbia dhe vazhdimisht pengon shqiptarët kryesisht në pakicat që jetojnë në shtetin e Serbisë”, ka deklaruar Musliu.

Enkel Rexhepi, që është kryetar i Këshillit Kombëtar Shqiptar, ankohet se shteti i Serbisë nuk u përgjigjet kërkesave për zgjidhjen e problemit.

“Me një fjalë, Ministrisë së Arsimit të Serbisë i pengojnë librat shqip dhe nuk ka gatishmëri për zgjidhjen e këtij ngërçi, që më tepër është politik sesa institucional. KKSH është e gatshme të bashkëpunojë për t’i sjellë librat nga R. e Shqipërisë”, ka theksuar Rexhepi.

Marrëveshja për libra në gjuhë shqipe për shkollat fillore u pat arritur nëntorin e 2021-tës, në një takim mes ministrit të atëhershëm të Arsimit në Serbi, Branko Ruzhiq, ministres së atëhershme për të Drejtat e Njeriut, Gordana Çomiq, përfaqësuesve të Këshillit Kombëtar të Shqiptarëve dhe të OSBE-së.

Asokohe, është arritur dakordim për bashkëpunim me Institutin për Vlerësimin e Cilësisë së Arsimit në Serbi, si dhe të përshpejtohen procedurat për miratimin e teksteve shkollore në shqip për shkollat fillore e ato të mesme.

Për shqiptarët në Preshevë, Bujanoc e Medvegjë, mësimi organizohet në tri institucione parashkollore, në 14 shkolla fillore dhe në tri shkolla të mesme.