Drejtoria “dembele” e Transformimit në Prishtinë, pa punë konkrete

Ilir Murseli është arkitekt dhe tash i emëruar drejtor i Drejtorisë së Transformimit, e themeluar muaj më parë nga kryetari i Prishtinës, Përparim Rama.

Me themelimin e Drejtorisë së Transformimit, një pjesë të punëve të drejtorisë së Investimeve Kapitale i kanë kaluar asaj.

Mandatin e ka marrë në shkurt, por që nga atëherë të pakta janë punët e realizuara prej kësaj drejtorie.

E Murseli vjen shumë rrallë në seancat e Kuvendit Komunal për t’iu përgjigjur pyetjeve për projektet e drejtorisë së tij.

KOHA ka provuar që të marrë një prononcim nga vetë ai, mirëpo ka thënë se nuk deklarohet për media.

Por zëdhënësi i komunës, Donat Lushaku, thotë se kjo drejtori ka pak kohë që është themeluar dhe nuk ka mund të punojë mjaftueshëm.

Ideja e themelimit të kësaj drejtorie nga kryetari Rama, sipas Lushakut, ka qenë që ta bëjë transformimin e kryeqytetit.

Edhe Arbëri 5 nën 2024 Jep dorëheqje drejtori i Transformimit në Prishtinë, Ilir Murseli

Sipas opozitës në kryeqytet, Rama nuk ka pasur fare nevojë që ta themelojë këtë drejtori, pasi ka numër të madh të drejtorive që nuk kanë punë konkrete.

Feim Osmani, asamblist i Lëvizjes Vetëvendosje, thotë që Rama e ka themeluar këtë drejtori vetëm që ta ndihmojë Murselin dhe jo për të kryer ndonjë punë.

Komuna e Prishtinës momentalisht i ka 17 drejtori. Disa prej tyre janë formuar nga Përparim Rama në shkurt të këtij viti kur edhe e ka rikonstruktuar kabinetin, pas prishjes së koalicionit me PDK-në.