Dialogu e Procesi i Berlinit, temë diskutimi mes Rohdes e Gërvallës

Ambasadori i Gjermanisë në Kosovë, Jorn Rohde, ka takuar ministren e Ministrisë së Jashtme dhe Diasporës së Kosovës, Donika Gërvallën.

Ndër temat që u diskutuan mes tyre ishte edhe dialogu me Serbinë e Procesi i Berlinit, i nisur më 2014 me qëllim të zgjidhjes së çështjeve të mbetura të hapura në rajon.

Rohde ka thënë se janë diskutuar edhe planet për intensifikimin e bashkëpunimit mes Kosovës dhe Gjermanisë.

“Takim i mrekullueshëm me ministren e Jashtme, Donika Gërvallën, sot. Diskutuam planet për intensifikimin e mëtutjeshëm të bashkëpunimit kosovaro-gjerman, dialogun për normalizim dhe Procesin e Berlinit, mes tjerash”, ka shkruar Rohde në Twitter.

Gërvalla nga ana tjetër u zotua se Qeveria e re e Kosovës do të punojë në thellimin e bashkëpunimit bilateral me Republikën Federale të Gjermanisë, në të gjitha fushat e interesit të përbashkët midis dy vendeve, duke nënvizuar se bashkëpunimi jo vetëm ekonomik por dhe nxitja e investimeve gjermane në Kosovë, do të jenë ndër prioritetet kryesore të saj si ministre.