Deputetja e Lidhjes Demokratike të Kosovës, Hykmete Bajrami, ka thënë se çmimit prej 64 eurosh, i prezantuar të dielën nga ministrja e Ekonomisë, Artane Rizvanolli, me të cilin KEK-u furnizon të dielën përmes bursës Shqiptare të Energjisë Elektrike ALPEX për ndërmarrjet, i shtohen edhe disa kosto të tjera.
Ajo e ka akuzuar Rizvanollin për manipulim, duke thënë se këtij çmimi i shtohen fitimi i KOSTT-it, fitimi i distribucionit KEDS, fitimi i KESCO-s, e edhe i KEK-ut.
“Sot 64 euro, nesër 99 euro, sa do të jetë pasnesër energjia që në treg të rregulluar kushton vetëm 29.6 Euro? Kur kanë shkuar Artanja e disa të tjerë në LVV, disa kanë menduar që do ta ndryshojnë Albinin, por që vjen dita e krejt bëhen si Albini pak kush e ka pritur. Paska thanë KEK-u sot po e blen rrymën 64.55 Euro një MWh përmes bursës Shqiptare të Energjisë Elektrike ALPEX, por nuk po e shpjegon se këtij çmimi derisa të arrij te 1300 ndërmarrjet e përjashtuara i shtohet plus kosto e transmisionit apo fitim i KOSTT-it, plus kosto apo fitimi i distribucionit KEDS, plus kosto apo fitimi i KESCO-s (se faturimin dhe inkasimin e bën KESCO se s’ka qysh e bën KEK-u), plus fitimi për KEK-un se tash drejtorit të ri duhet t’ia garantojë performancën”, ka shkruar ajo në Facebook.
Sipas Bajramit, ky çmim për MWh nuk është çmim final i energjisë, por vetëm i asaj “që deri dje ka kushtuar 29.6 euro”.
“Po Rizvanolli duhet përgjigjur: Pse KEK-u po blen sot energji në ALPEX me çmim 64.55 euro kur çmimi në HUPX qenka 53.69 euro edhe pse s’po ju tregon ndërmarrjeve a ka KEK-u kontratë afatgjatë për blerje të energjisë apo gjysma e ekonomisë së Kosovës është në mëshirën e tregtarëve e kumbarëve të energjisë. P.sh. nesër çmimi mesatar në ALPEX do të jetë 99.87Euro MWh. Sa do të jetë pasnesër? Mos harroni se KEK 60 ditë është furnizues i mundësisë së fundit, pas 60 ditëve, mandej kalohet te çmimi deri 260 euro MWh”, ka shtuar tutje Bajrami.
