Alija: Dëshmia e Clarkut dhe të tjerëve do të vlerësohet ndryshe nga trupi gjykues

Avokati nga Fondi për të Drejtën Humanitare, Amer Alija, ka thënë se edhe dëshmia e ish-komandatit të NATO-s, Wesley Clark pritet të jetë në vijë të njëjtë me dëshmitarët e deritanishëm të mbrojtjes, në rastin e gjykimit ndaj Hashim Thaçit dhe të tjerëve në Hagë.

Alija në emisionin “60 Minuta” në KTV, deklaroi se pesha e këtyre dëshmitarëve është e lartë dhe pritet të vlerësohet nga trupi gjykues.

“Ish-komandanti i NATO-s, Wesley Clark, ka pasur kontakte direkte me komandantët e UÇK-së. Edhe dëshmia e Wesley Clark do të jetë në vijë me strategjinë të cilën e ka krijuar tashmë mbrojtja. Pesha e dëshmitarëve të propozuar nga mbrojtja ka qenë e ngjashme sepse qëllimi i dëshmitarëve është të tregojnë që struktura e UÇK-së ka qenë de-facto e jo de-jure. Në rastin konkret mbrojtja i ka përzgjedhur me kujdes zyrtartët, diplomatët e persona të tjerë për të treguar një gjë të tillë. Pesha e këtyre dëshmitarëve është e lartë dhe do të vlerësohet me një konsideratë tjetër nga trupi gjykues”, deklaroi Alija.

Alija po ashtu tha se të sigurohen këta dëshmitarë nuk ka qenë e lehtë për shkak të autorizimeve që iu duhet t’i marrin nga shteti i tyre, duke kujtuar që mbrojtja në fillim ka paralajmëruar 14 dëshmitarë e më vonë ky numër ishte reduktuar.

“Mbrojtja në fillim ka paralajmëruar që do t’i ftojë rreth 14 dëshmitarë, por me kalimin e kohës e kemi parë që numri është reduktuar, pikërisht për shkak të vështirësisë së marrjes së autorizimeve nga shtetet e caktuara për ta lejuar dëshmitarin e caktuar që të ndajë njohuritë e tij në lidhje me rrethanat që mbrojtja konsideron se do të shkojnë në favor të tyre”, deklaroi Alija në emisionin “60 Minuta” në KTV.

Edhe Arbëri 17 nën 2025 Clarku nis dëshminë në Hagë

Në Dhomat e Specializuara të Kosovës në Hagë, të enjten vazhdoi dëshminë e tij Michael Durkee, këshilltari i ish-komandantit të NATO-s për Evropë, Wesley Clark. Dëshminë e nisi një ditë më parë, ku tha se Thaçi nuk kishte rol ushtarak në UÇK, por vetëm politik. Durkee e kreu sot dëshminë. Ai ishte dëshmitar i gjashtë i mbrojtjes.

Seanca e radhës në këtë rast gjyqësor do të mbahet të hënën duke filluar nga ora 12:00 (me 45 minuta vonesë në transmetim) në të cilën do të dëshmojë gjenerali Wesley Clark. Clark do të jetë dëshmitari i fundit i mbrojtjes në këtë rast gjyqësor.