Aktakuzë ndaj katër personave për falsifikim të rezultatit të votimit në Shtime

Prokuroria Themelore në Ferizaj ka ngritur aktakuzë ndaj katër personave me inicialet Y.S, B.V, Sh.B dhe R.R, të dyshuar për veprën penale “falsifikim i rezultateve të votimit” për zgjedhjet e 28 dhjetorit të vitit të kaluar.

Sipas njoftimit, në Qendrën Komunale të Numërimit në Shtime, të pandehurit, në cilësinë e anëtarëve të ekipit të numërimit, dyshohet se kanë ndërmarrë veprime të koordinuara për të shtrembëruar rezultatet e votimit.

Prokuroria bën të ditur se njëri nga të pandehurit ka lexuar në mënyrë të pasaktë votat nga fletëvotimet, ndërsa një tjetër, duke pasur qasje në sistemin elektronik të Komisioni Qendror i Zgjedhjeve, ka regjistruar të dhëna të pasakta. Ndërkohë, dy të pandehurit e tjerë, edhe pse të pranishëm në proces, nuk kanë ndërmarrë veprime për të parandaluar parregullsitë.

Sipas aktakuzës, këto veprime kanë çuar në regjistrimin e rezultateve të pasakta, të cilat janë konstatuar gjatë procesit të rinumërimit në Qendrën e Numërimit dhe Rezultateve, duke cenuar integritetin dhe besueshmërinë e procesit zgjedhor.

Prokurori i çështjes i ka propozuar gjykatës që, pas shqyrtimit gjyqësor dhe administrimit të provave, të pandehurit të shpallen fajtor dhe të dënohen sipas ligjit.