“Vidovdani” me provokime: 10 serbëve iu ndalua hyrja në Kosovë, një u shoqërua në Polici

Dhjetë serbëve, shtetas të Malit të Zi, u është ndaluar hyrja në territorin e Kosovës në orët e para të mëngjesit, për shkak se u janë gjetur fanella me mbishkrime të nxitjes së urrejtjes, ka bërë të ditur Policia e Kosovës, bazuar në raportin zyrtar për planin operativ të manifestimit “Vidovdani”. Atyre u janë konfiskuar fanellat e gjetura në vetura. Ndalimi ka ndodhur në tri raste të ndara në pikëkalimet Vërmicë dhe Kullë.

Në ngjarjen, që u përcoll me provokime në disa raste, një person është shoqëruar në Polici për thirrje dhe nxitje të urrejtjes e përçarjes.

Ka përfunduar ceremonia e Vidovdanit, ku shumë serbë të ardhur edhe nga Serbia u mblodhën të martën në Gazimestan, për ta shënuar atë.

Pas ceremonisë, serbët bënë provokime të ndryshme, duke valuar flamuj serb e rusë, ndërkohë edhe bënë thirrje “Kosova është Serbi”.

Policia, para fillimit të ceremonisë ka kontrolluar veç e veç pjesëmarrësit, e disa prej tyre edhe i ka zhveshur lart, për shkak të mesazheve provokuese në fanellat e tyre.

Policia nuk ka dhënë ndonjë raport për këtë ngjarje.

Viteve të shkuara, Policia ka bërë edhe arrestime për shkak të prishjes së rendit nga pjesëmarrësit, ndërkohë që edhe ka gjetur armë të ftohta, si thika e boks hekuri. Madje, një i ri nga Mali i Zi edhe është dënuar me burgim.

Ceremonia e serbëve për shënimin e Vidovdanit ka përfunduar. Qindra serbë të mbledhur në Gazimestan, pas ceremonisë kanë nisur me provokime, duke nxjerr flamujt serbë e rusë.

Serbët shpalosen edhe flamuj të tjerë, si atë me hartën e Kosovës ku thuhet: “S’ka dorëzim”, duke iu referuar luftës sipas tyre të vazhdueshme për siç thonë ata, “ruajtjen e Kosovës”.

Para fillimit të ceremonisë, Policia e Kosova ka kontrolluar veç e veç serbët dhe disa i ka kthyer prapa për shkak të fanellave provokuese.

Provokime të tillë, serbët bëjnë çdo vit në shënimin e kësaj feste në afërsi të Prishtinës.

Policia e Kosovës nuk i ka lejuar disa serbë që t’i afrohen vendit në Gazimestan, ku po shënohet Vidovdani.

Serbët bartnin fanella provokuese, si hartën e Kosovës dhe katër shkronjat “S” dhe për këtë policia e Kosovës u doli përpara dhe i ktheu prapa.

Të gjithë pjesëmarrësit në këtë festë janë duke u kontrolluar nga policia.

Viteve të kaluara, të pjesëmarrësit serbë janë gjetur edhe armë të ftohta, ndërkohë që edhe ka pasur arrestime për shkak të provokimeve.

+ 9

Ka nisur tubimi i serbëve në Gazimestan, për të shënuar Vidovdanin.

Policia e Kosovës po i kontrollon pjesëmarrësit e mbledhur, e shumë prej të cilëve kanë ardhur edhe nga Serbia.

Vitin e kaluar, në këtë organizim ishte arrestuar një person për provokim ndëretnik, ndërkohë që ishin gjetur edhe armë të ftohta. Ai më pas u dënua me disa muaj burgim.

Kremtimi i kësaj dite ndërlidhet me përvjetorin e Betejës së Kosovës, që historia serbe e njeh si fitore shpirtërore të saj, pavarësisht humbjes së madhe të forcave ballkanike dhe vrasjes së princit serb Lazar.

Shënimi përvjetorit të Betejës së Kosovës në vitin 1989, në kohën e udhëheqjes së presidentit serb Sllobodan Millosheviq, u kthye në kulmin e nacionalizmit në ish-Jugosllavi, me shpalljen siç thuhej të bashkimit të Serbisë, përmes rrënimit të autonomisë së Kosovës dhe me paralajmërimin e luftërave të përgjakshme që çuan në shkatërrimin e ish federatës jugosllave.

© KOHA. Të gjitha të drejtat janë të rezervuara.