Kandidati i LDK-së për kryetar të Vushtrrisë, Xhafer Tahiri, ka premtuar se nëse fiton besimin e qytetarëve, atëherë për tre muaj do ta zgjidhë çështjen e ujit të pijshëm, në qytet e fshatra.
Ai në emisionin “Zgjedhjet në Kohë – Debati për Vushtrrinë”, ka thënë se projektin për ujë të pijshëm në gjithë territorin e komunës e ka lënë të gatshëm, sa ishte kryetar nga viti 2017 deri më 2021.
“E bëjmë për 3 muaj këtë punë, sepse nuk ka punë më shumë. Kryetari aktual ka pritur 4 vjet që tash në fund të provoj ta lëshojë ujin dhe ta ketë si trofe në zgjedhje, sepse nuk ka asnjë projekt tjetër të realizuar”, ka thënë ai. “Punët kanë qenë të përfunduara. Rezervuari në Bequk ka qenë i përfunduar. Rezervuari në Dumnicë ka qenë i përfunduar, krejt çka është dashur të bëhet në këto katër vjet është që të blihen pompat, të mbushen këta rezervuar me ujë dhe pastaj të bëhet furnizimi”.
Sipas tij, në mandatin kur ka udhëhequr me komunën, 75 për qind të fshatrave u është siguruar uji i pijshëm.
“Natyrisht që besojmë se e kryejmë, pasi 75 për qind të familjeve të Vushtrrisë i kemi kyçur në ujësjellës në mandatin tonë. Dhe vetëm pandemia Covid ka ndikuar që të mos e përfundojmë me ritmin e filluar projektin për 100 për qind, për çka u kërkoj falje qytetarëve të Vushtrrisë. Ndoshta është dashur të punojmë edhe më shumë që të kemi ujë të pijes”, ka thënë Tahiri.
Zgjedhjet lokale do të mbahen më 12 tetor.
