Prokuroria Themelore në Gjakovë të premten ka njoftuar se ka kërkuar paraburgim për 22 kryesues lidhur me dyshimet për dallavere me vota.
Të gjithë të dyshuarit ngarkohen për veprën penale “Falsifikim i rezultateve të votimit”.
“Me vendim të Prokurorit të Shtetit, 22 kryesuesit janë ndaluar në kohëzgjatje prej 48 orësh, ndaj të cilëve Prokuroria ka paraqitur kërkesë për caktimin e masës së paraburgimit pranë gjykatës kompetente”, thuhet në njoftim.
Në Gjakovë, dallime në rezultatet e kandidatëve për deputetë pas rinumërimit ka pasur më shumë te Partia Demokratik e Kosovës (PDK). Kandidates Adonjeta Zymberi-Selmani iu hoqën 383 vota, ndërsa Hajdar Beqës 244.
Te Lëvizja Vetëvendosje, Agon Batushës iu hoqën 215 vota.
Në partitë dhe kandidatët e tjerë pati dallime të vogla.
Deri tash, për manipulime me vota, 28 persona janë në paraburgim në Prizren dhe 15 në Malishevë.