WhatsAppi fshin mbi 6.8 milionë llogari

WhatsAppi ka mbyllur mbi 6.8 milionë llogari të lidhura me mashtrues që kishin në shënjestër njerëz nga e gjithë bota gjatë gjysmës së parë të këtij viti, ka bërë të ditur kompania mëmë, Meta.

Shumica e këtyre llogarive ishin të lidhura me qendra mashtrimi të menaxhuara nga grupe kriminale të organizuara në Azinë Juglindore, sipas kompanisë Meta.

Njoftimi u bë ndërkohë që WhatsAppi ka prezantuar masa të reja kundër mashtrimeve, përfshirë njoftime paralajmëruese kur një përdorues shtohet në një bisedë në grup nga dikush që nuk është në listën e kontakteve të tij.

Fushata synon të godasë një taktikë gjithnjë e më të përhapur, ku kriminelët marrin nën kontroll llogaritë e WhatsAppit ose shtojnë përdorues në grupe që promovojnë skema mashtruese investimi dhe mashtrime të tjera.

Meta deklaroi se WhatsAppi “i identifikoi dhe i hoqi në mënyrë proaktive llogaritë përpara se qendrat e mashtrimit të mund t’i aktivizonin ato”.