Shtetet e Bashkuara të Amerikës kanë arritur të parandalojnë përpjekjet e hakerave të një grupi të sponsorizuar nga shteti kinez që kishte shënjestruar infrastrukturën kryesore publike si rrjetin elektrik dhe tubacionet, ka thënë FBI-ja, shkruan BBC.
Drejtori i FBI-së, Christopher Wray, u tha ligjvënësve se kishte përfunduar një fushatë për të mbyllur grupin “Volt Typhoon”.
Grupi hakoi qindra ruterë të vjetër zyrash për të hyrë në të dhënat mbi asetet e SHBA-së, pretendoi Wray.
Qeveria kineze ende nuk i është përgjigjur akuzave.
Megjithatë, ajo ka mohuar më parë akuzat për luftë kibernetike të sponsorizuar nga shteti kundër vendeve të tjera. Në të kaluarën, ajo ka akuzuar gjithashtu SHBA-në si “perandoria më e madhe e hakerëve në botë dhe hajduti kibernetik global”.
Edhe
Kina akuzon SHBA-në për shkelje kibernetike
Wray të mërkurën i tha një komiteti të Kongresit amerikan se Kina qëllimisht po krijonte bazat për të gjymtuar sistemet kyçe të infrastrukturës amerikane në rast të një konflikti armiqësor.
Përpjekjet e hakerimit të grupit “Volt Typhoon” u zbuluan për herë të parë majin e kaluar në SHBA, pasi Microsoft paralajmëroi se grupi kishte shënjestruar disa asete publike, përfshirë hakerimin në llogaritë e postës elektronike të qeverisë.
