Rreth 550,000 llogari janë bllokuar nga Meta gjatë ditëve të para të ndalimit historik të mediave sociale për fëmijët në Australi.
Në dhjetor, ka hyrë në fuqi një ligj i ri që kërkon që platformat më të njohura të mediave sociale në botë, përfshirë Instagramin dhe Facebook-un, të mos lejojnë australianët nën moshën 16 vjeç të kenë llogari në platformat e tyre.
Ky ndalim, i cili po vëzhgohet nga afër në mbarë botën, u justifikua nga aktivistët dhe qeveria si i domosdoshëm për të mbrojtur fëmijët nga përmbajtjet dhe algoritmet e dëmshme.
Kompani si Meta kanë thënë se bien dakord që duhet bërë më shumë për t’i mbajtur të rinjtë të sigurt në internet. Megjithatë, ato vazhdojnë të argumentojnë në favor të masave të tjera, me disa ekspertë që shprehin shqetësime të ngjashme.
“Ne i bëjmë thirrje qeverisë australiane të angazhohet në mënyrë konstruktive me industrinë për të gjetur një rrugë më të mirë përpara, si për shembull nxitjen e të gjithë industrisë për të rritur standardet në ofrimin e përvojave të sigurta, që ruajnë privatësinë dhe janë të përshtatshme për moshën në internet, në vend të ndalimeve të përgjithshme”, ka thënë Meta në një përditësim në blog.
Kompania ka njoftuar se kishte bllokuar 330,639 llogari në Instagram, 173,497 në Facebook dhe 39,916 në Threads gjatë javës së parë të zbatimit të ligjit të ri.
Ajo ka përsëritur gjithashtu argumentin se verifikimi i moshës duhet të bëhet në nivelin e dyqaneve të aplikacioneve, diçka që, sipas saj, ul barrën e përputhshmërisë si për rregullatorët ashtu edhe për vetë aplikacionet, dhe se duhet të krijohen përjashtime me miratimin e prindërve.
Qeveri të ndryshme, nga shteti amerikan i Floridës deri te Bashkimi Evropian, kanë eksperimentuar me kufizimin e përdorimit të mediave sociale nga fëmijët. Por, së bashku me kufirin më të lartë të moshës prej 16 vjeç, Australia është juridiksioni i parë që nuk lejon përjashtime me miratimin e prindërve në një politikë të tillë duke i bërë ligjet e saj më të rreptat në botë.