Hendbollistët e Kosovës u mposhtën thellë të mërkurën në Torshavn nga Ishujt Faroe, 32:21. Ballafaqim edhe më i vështirë vlerësohet të jetë ai i së dielës mbrëma. Kosova, në palestrën “1 Tetori” në Prishtinë nga ora 17:15, do të jetë nikoqire e Përfaqësueses së Holandës, në ndeshjen e dytë të fazës së dytë kualifikuese për “Euro 2026”.
Ishujt Faroe dhe Holanda i prijnë Grupit 6 me nga dy pikë. Pa pikë janë Ukraina dhe Kosova. Ukraina të dielën takohet me Ishujt Faroe.
Për ndeshjen ndaj holandezëve, kapiteni Valon Dedaj kërkon përkrahjen e madhe nga tribunat. Vetëm me ndihmën e tyre ai thotë se Kosova mund të shfaqë paraqitje të mirë.
“Kundër Holandës luajmë në shtëpi, në Kosovë, dhe me tifozë të shumtë që besoj se do të vijnë, sepse na duan ne. Ne kemi nevojë për tifozët, për të fituar, për të bërë një lojë të mirë këtu”, ka thënë kapiteni Dedaj për faqen zyrtare të Federatës së Hendbollit të Kosovës.
Dedaj ka folur edhe për ballafaqimin me Ishujt Faroe, por edhe për atë që i pret të dielën mbrëma në kryeqytet.
“Në Ishujt Faroe kishim problem për shkak se nuk kishim tifozët për të na dhënë përkrahje. Për këtë ishte vështirë për t’u kthyer në lojë. Besoj se në Kosovë ne gjithmonë kemi luajtur mirë. Çdo herë kemi pasur rezultate të mira”, është shprehur Dedaj.
Holanda ishte përfaqësuesja e vetme që ka shënuar 40 gola në ndeshjen e parë të kësaj faze kualifikuese grupore. “Tulipanët” fituan ndaj ukrainasve me rezultatin 40:39.
Kosova është në kërkim të paraqitjes historike në një ngjarje madhore. Në kualifikime për herën e parë u paraqitën para Evropianit 2018. Në këtë fazë të garës, Kosova u paraqit edhe në kualifikimet për në “Euro 2020”, por nuk ia arriti synimit që kishte.
Kosova dhe Holanda e zhvillojnë ndeshjen e parë mes vete, pasi më herët nuk janë takuar asnjëherë.
Në Kampionatin Evropian 2026 që do të organizohet në Danimarkë, Suedi e Norvegji, do të luajnë dy vendet e para prej tetë grupeve sa janë në total.
Kualifikimi mund të arrihet edhe nga pozita e tretë.
Katër përfaqësueset më të mira të asaj pozite avancojnë tutje po ashtu.
