Përzgjedhësi i Skocisë, Steve Clarke, e kupton pse legjenda e kësaj përfaqësueseje, Graeme Souness, dëshiron që vendi i tij të humbë kundër Ukrainës në plejofin e ngarkuar emocionalisht, për kualifikim në Kampionatin Botëror “Katari 2022”. Ndeshja gjysmëfinale e plejofit Skoci – Ukrainë luhet të mërkurën prej orës 20:45 në Glasgow.
Megjithatë Clarke shpreson për një rezultat tjetër. Ai pret që lojtarët e Ukrainës të jenë “gati për ndeshjen” që do të luhet në stadiumin “Hampden Park”.
“Asgjë nuk kam veçse mendime të mira për ukrainasit dhe urime të mira për ta – përveçse gjatë lojës. Pra, simpatia e madhe e Skocisë për Ukrainën do të ndalojë gjatë 90 minutave të ndeshjes”, tha Clarke të martën. “Padyshim që ata duan të shkojnë në Katar dhe të përfaqësojnë vendin e tyre. Por unë jam i përkushtuar të shkoj në Katar me Skocinë”.
Fituesi i këtij dueli do të luajë në finalen e plejofit me Uellsin në Cardiff, të dielën, për një vend në Botërorin e Katarit që mbahet në nëntor të këtij viti.
Ndeshja Skoci – Ukrainë është dashur të luhet në mars. Por u shty nga FIFA për shkak se Ukraina nuk mundi të bënte gati ekipin për të luajtur, pasi Ukraina u pushtua nga Rusia. Lufta në Ukrainë po vazhdon ende.
Edhe
Ukrainasit shpresojnë për fitore në fushën e futbollit në Glasgow
Presidenti ukrainas, Volodymyr Zelensky, dha bekimin e tij për lojtarët dhe përzgjedhësin e Ukrainës, Oleksandr Petrakov, që të largohen nga atdheu i tyre për t'u përgatitur dhe për të luajtur ndeshjen e rëndësishme kundër Skocisë.
Souness, ish-lojtari i Liverpoolit dhe ish-kapiten i Përfaqësueses së Skocisë, tha se dëshiron që Ukraina ta fitojë këtë ndeshje. Souness shtoi se dëshiron që Ukraina të kualifikohet në Botëror sepse “është shumë më e rëndësishme se futbolli që të dërgohet një mesazh në mbarë botën se sjellja e Rusisë është e papranueshme”.
Për komentet e Sounessit mendim iu kërkua përzgjedhësit Clarke, i cili tha: “Unë nuk mund ta vendos veten në mendjen e askujt tjetër. Të gjithë kanë mendimin e tyre. Mendimi do të jetë i ndryshëm. Unë fokusohem te vetja. Unë dua të shkoj në Katar me Skocinë dhe lojtarët duan të shkojnë dhe të luajnë në Kampionatin Botëror”.
Clarke ka insistuar se aspak nuk është i dëshpëruar me qëndrimin e legjendës Souness.
“Jo, jo në asnjë mënyrë. Të gjithë mund të kenë mendimin e tyre dhe ta shprehin lirshëm atë”, insistoi Clarke.
Përfaqësuesja e Ukrainës është e përbërë nga futbollistë të cilët nuk kanë luajtur ndeshje zyrtare për pothuajse gjashtë muaj shkaku i luftës në vendin e tyre. Një kamp stërvitor njëmujor në Slloveninë e sigurt ka ofruar ndeshje përgatitore të organizuara kundër klubeve në Gjermani, Itali dhe Kroaci, duke u dhënë lojtarëve nga ekipet ukrainase, si Shakhtar Donetsk dhe Dynamo Kyiv, një shans për t’u bërë gati për plejof.
“Natyrisht që ndeshjet e Ukrainës janë të njohura në futbollin ndërkombëtar dhe mund të ndihmojnë në përgatitje për ndeshje zyrtare. Ne nuk kemi luajtur në mënyrë zyrtare që nga nëntori, njësoj si Ukraina”, u shpreh Clarke. “Ne kemi marrë pamje nga ndeshjet miqësore të Ukrainës, të cilat bazoheshin më shumë në ngritjen e ukrainasve në shpejtësinë e ndeshjes. Ata janë stërvitur mirë për katër javë dhe jam i bindur se do të jenë të gatshëm për këtë ndeshje”.
Edhe
Ukraina merr “rrugën politike” për kualifikim në Botëror
Clarke tha se lojtarët e Ukrainës nuk do ta kenë aspak lehtë dhe në këtë ndeshje do ta gjejnë veten në një situatë të jashtëzakonshme duke pasur parasysh se familjarët i kanë në luftë.
“Sigurisht që nuk do të jetë lehtë për ta dhe duhet kuptuar plotësisht”, shtoi Clarke, i cili pret që tifozët e Skocisë ta respektojnë himnin e Ukrainës, madje ta duartrokasin atë.
