Telashet po vazhdojnë për mesfushorin e Juventusit, Paul Pogba. Francezi është lënduar sërish dhe pritet të mungojë për disa javë, ka raportuar të hënën e përditshmja italiane “Tuttosport”.
Pogba i mungoi Juventusit në fitoren e fundit ndaj Sampdorias 4:2 për shkak të një shqetësimi në muskulin e këmbës, lëndim që po duket se do ta mbajë jashtë fushe për të paktën katër javë.
Në fund të muajit të shkuar, Pogba u rikthye në fushë pas një pauze prej gati një viti dhe regjistroi vetëm dy paraqitje për Juventusin përpara se të lëndohet sërish. Te Juventusi janë të shqetësuar me gjendjen e 29-vjeçarit, i cili po ka vazhdimisht probleme me lëndimet dhe nuk po arrin të rikuperohet plotësisht. Ai iu bashkua Juventusit verën e shkuar si lojtar i lirë dhe me ekipin italian ka kontratë deri në vitin 2026.