Përzgjedhësi i Uellsit, Robert Page, është i bindur se Gareth Bale duhet të trajtohet me kujdes në klubin e tij të ardhshëm, pasi sulmuesi frymëzoi përfaqësuesen e tij për t’u kualifikuar në kampionatin botëror “Katari 2022”. Uellsi luan në Botëror për herë të parë pas 64 vjetësh.
Bale është në kërkim të një ekipi të ri pasi i dha fund qëndrimit të tij të trazuar nëntëvjeçar te skuadra e Real Madridit. Kapiteni i Uellsit këmbëngul se ka “shumë oferta”, pavarësisht se luajti shumë pak te Real Madridi në edicionin 2021/22, në të cilin ekipi spanjoll triumfoi në La Liga dhe në Ligën e Kampionëve. Bale përkujtoi cilësinë e tij me një paraqitje me ndikim në fitoren 1:0 të Uellsit në finalen e plejofit për kualifikim në Botëror kundër Ukrainës, të dielën e shkuar në Cardiff.
Me Uellsin, që tashmë ka siguruar një vend në Botërorin që nis në muajin nëntor në Katar, Page thotë se ish-ylli i Tottenhamit, Bale, duhet të gjejë vendin e duhur për t’u transferuar, për të arritur formën e tij maksimale për turneun e madh të futbollit. Klubi i vendlindjes së Balet, Cardiffi, pastaj Newcastle Unitedi dhe disa ekipe të MLS-së në Shtetet e Bashkuara të Amerikës janë vlerësuar destinacione të mundshme për sulmuesin.
32-vjeçari fitoi një mori medaljesh me fanellën e Realit, por kishte një listë të gjatë lëndimesh gjatë viteve të tij të fundit në Spanjë. Page e di se është e rëndësishme që Bale ta menaxhojë me kujdes gjendjen e tij fizike.
“Mos më keqkuptoni, unë kam qenë vetë trajner klubi dhe është e vështirë. Kur përpiqeni të krijoni një mjedis i cili përbëhet prej lojtarëve të klasës botërore, atëherë nuk është aspak lehtë”, tha Page të martën në konferencën për shtyp. “Është më e vështirë ta bësh këtë në një klub ku duhet ta kesh atë autoritet mbi lojtarët dhe të thuash: ‘Kështu do t'i bëjmë gjërat dhe do të stërvitemi sot’”.
Edhe
Uellsi do ta ketë ndihmën e Bales në kualifikimet për “Euro 2024”
Megjithatë, Bale ka një trajtim tjetër te Përfaqësuesja e Uellsit dhe këtë e pranon edhe përzgjedhësi Page.
“Asnjë mungesë respekti për lojtarët e tjerë të Uellsit, por ne nuk kemi dhjetë Gareth Bale të tjerë. Kështu që ne duhet të kujdesemi për të në mënyrë të veçantë, pra të mos e menaxhojmë situatën sikur në klub. Ai duhet ta marrë vetë përgjegjësinë. E kjo do të përcaktohet nëse ai luan vazhdimisht për klubin”.
Për shkak të trajtimit tjetër që e ka te përfaqësuesja, Bale do të pushohet për ndeshjen e Uellsit në Ligën e Kombeve kundër Holandës, që zhvillohet në Cardiff të mërkurën.
Agjenti i Balet, Jonathan Barnett, ka refuzuar të përjashtojë mundësinë që klienti i tij për edicionin 2022/23 të jetë pjesë e skuadrës së Cardiffit, që bën gara në kategorinë e dytë të Anglisë – Championship. Barnett ka insistuar se klubi i ardhshëm i Balet nuk do të ketë të bëjë aspak me paratë, por me dëshirën e tij.
Edhe
Bale thotë se është gati për paraqitje në Botëror
“Ajo që bën Bale prej edicionit të ri nuk ka të bëjë me paratë”, tha shkurt Barnett.
Ndërkohë përzgjedhësi Page i pyetur nëse ka ndonjë informatë për të ardhmen e Balet, tha. “Nuk po gënjej kur them se nuk e kam idenë se çfarë po bën. Nuk e kam pasur atë bisedë me të. Unë do të flas me të, por varet nga Bale dhe familja e tij që të vendosin se çfarë është më e mira për të për ta sjellë në kuadrin e duhur mendor dhe fizik për muajin nëntor”.
