Robert Lewandowski sapo ka mbushur 33 vjet, por makineria e golave të Bayern Munichut nuk po tregon asnjë shenjë ngadalësimi pas “hat-trickut” të tij të fundit në Bundesligë.
Lewandowski tani ka shënuar tre ose më shumë gola në 15 ndeshje të ligës gjermane, pasi shënoi një tjetër “hat-trick” në fitoren e thellë të Bayernit 5:0 ndaj Herthës së Berlinit. Majin e kaluar, sulmuesi i Polonisë theu rekordin 49-vjeçar të Gerd Muellerit, duke shënuar 41 gola në një sezon të Bundesligës.
Këtë sezon Lewandowski ka filluar nga aty ku e la, pasi ka shënuar pesë gola në tri ndeshje kampionale. Të shtunën ai kaloi shifrën e 300 golave për Bayernin, megjithatë, oreksi i tij për të shënuar nuk tregon asnjë shenjë ngadalësimi. E për këtë ritëm Lewandowski është përgëzuar edhe nga trajneri Julian Nagelsmann.
“Ai ka arritur kaq shumë vitet e fundit dhe ende ka një uri të tillë. Ajo që e bën atë të veçantë është larmia e finalizimit të tij. Kur e shihni fuqinë e tij në ajër - ai është i dëshpëruar për të shënuar gola”, tha Nagelsmann.
Pasi Thomas Mueller i dha Bayernit epërsinë në “Allianz Arena”, Lewandowski shënoi dy herë me kokë dhe një herë më këmbë për ta kompletuar “hat-trickun” e tij. Në fakt, Lewandowski mund ta kishte përfunduar ndeshjen me katër gola, pasi qëllimisht e la topin të rrokullisej tek Muelleri, i cili e kaloi në epërsi Bayernin në minutën e gjashtë të takimit. Po ashtu, edhe Mueller nuk hezitoi për ta vlerësuar gjestin e madh të Lewandowskit, i cili nuk u tregua aspak vetjak në atë situatë.
“Ai tani lëshon topa në zonën e penalltisë për dikë në një pozitë më të mirë. Unë e lavdërova atë në pjesën e parë dhe ne u pajtuam që ai është në nivelin tjetër. Ai e kupton që nëse nuk tregohet egoist, prapë merr pasime nga ne dhe shënon golat e tij”, tha Mueller.
Me afrimin e fundit të karrierës së tij, Lewandowskit i kanë mbetur shumë pak suksese për t’i arritur.
Ai fitoi Ligën e Kampionëve me Bayernin në sezonin 2019/20, u zgjodh lojtari më i mirë i FIFA-s për vitin 2020, dhe më në fund kapi rekordin e Gerd Muellerit për golat e një sezoni në Bundesligë. Mirëpo Lewandowski insiston se nuk i interesojnë aspak rekordet.
“Unë nuk mendoj për rekordet, unë jam i përqendruar vetëm në detyrën time çdo lojë. Nëse vendos një rekord apo diçka tjetër, nuk është e rëndësishme për mua. Gjëja e rëndësishme është që skuadra të luajë mirë dhe atëherë unë përfitoj nga kjo”, ka thënë Lewandowski.
Golat e tij shpesh e çojnë në fitimin e trofeve. Që kur iu bashkua Bayernit në vitin 2014, Lewandowski ka fituar shtatë tituj kampioni në Bundesligë, për t’i shtuar edhe dy që i fitoi me Borussia Dortmundin. Këtë vit golat e tij mund t’ia japin Bayernit titullin e dhjetë rresht në Bundesligë. Ai është i njohur për një regjim të rreptë të përgatitjes fizike, vëmendje ndaj ushqyerjes dhe dëshirës për t’u përmirësuar.
Ai ka edhe dy vjet në kontratën e tij dhe është fituesi më i madh i Bayernit, me një pagë prej rreth 20 milionë eurosh në vit. Lewandowski ka qenë prej kohësh një objektiv për klubet e tjera kryesore të Evropës. Ka raporte se agjenti i Lewandowskit, Pini Zahavi, ka pyetur nëse Paris Saint-Germaini dëshiron të nënshkruajë me sulmuesin. Por shokët e tij të skuadrës në Bayern e dinë se çfarë cilësie e kanë në ekip me Lewandowskin.
“Ai shënoi tre gola ndaj Herthas, natyrisht, ka shumë lojtarë të mirë në Bundesliga të cilëve u duhen vite për të shënuar një ‘hat-trick’. Sulmi ynë është i kompletuar me Lewan”, këmbënguli Mueller.