Legjenda Ali Daei refuzon ftesën për Botëror mes protestave në Iran

Legjenda e futbollit të Iranit, Ali Daei ka thënë se ka refuzuar një ftesë për Kupën e Botës në Katar për të qëndruar në vendin e tij, ku po zhvillohen protesta antiqeveritare. Kupa e Botës “Katari 2022” fillon të dielën (20 nëntor), pasi Katari pritës do të përballet me Ekuadorin në ndeshjen hapëse të edicionit të parë dimëror të turneut.

Daei, megjithatë, nuk do të jetë i pranishëm edhe pse Irani luan në Grupin B me Anglinë, Uellsin dhe SHBA-në, me 53-vjeçarin që ka zgjedhur të “shpreh simpatinë” për të qëndruar me bashkatdhetarët e tij. Protestat shpërthyen në Iran pasi Mahsa Amini vdiq në paraburgim më 16 shtator, ku 22-vjeçarja u arrestua nga policia e moralit për dyshimin se kishte veshur shaminë e saj në mënyrë të pahijshme.

“Përshëndetje për bashkatdhetarët e mi të dashur dhe të nderuar” u shkroi Daei 10.7 milionë ndjekësve të tij në Instagram. “Në këto ditë kur shumica prej nesh nuk ndihen mirë, iu përgjigja jo ftesës zyrtare të FIFA-s dhe Federatës së Futbollit të Katarit për të marrë pjesë në Kupën e Botës me gruan dhe vajzat e mia, për të qenë me ju në atdheun tim dhe për të shprehur simpatinë time”.

Daei, i cili ishte golashënuesi më i mirë në historinë e futbollit ndërkombëtar derisa Cristiano Ronaldo theu rekordin e tij vitin e kaluar, dedikoi mesazhin e tij për “familjet që humbën të dashurit e tyre në këto ditë”. “Duke shpresuar për ditë të ndritshme për Iranin dhe iranianët”, shtoi ai.

Postimi i Daeit mori dy milionë pëlqime brenda disa orësh nga postimi, pavarësisht ndalimit të vazhdueshëm të Instagramit nga Irani dhe goditjes së internetit.