Peja ka shënuar edhe një fitore në Superligën e Kosovës në basketboll. Por fitorja ishte shumë më e vështirë se që kanë pritur në ekipin pejan. Të hënën mbrëma në Suharekë, Peja e mposhti Ponte Prizrenin me rezultatin 91:83.
Ndeshja u vendos vetëm pas vazhdimit prej pesë minutave. Ponte e organizoi këtë ndeshje në Suharekë për shkak të punimeve në palestrën në Prizren. Numri i shikuesve ishte fare i vogël. Ndeshjen më mirë e nisën prizrenasit që në pjesën e parë krijuan epërsi deri në 20 pikë.
Por pejanët nuk u dorëzuan dhe u kthyen gradualisht në lojë. 13 sekonda para fundit, Isiah Umipig shënoi për tri pikë për të barazuar rezultatin në 74:74. Më pas Ponte Prizreni humbi aksionin, ndërsa gjuajtja e Rodney Purvisit të Pejës nuk e gjeti cakun. Na vazhdimin prej pesë minutave, Peja shfaqi më shumë dhe shënoi fitoren e rëndësishme.
Peja tani i ka 12 fitore e tri humbje. Ponte Prizreni pësoi humbjen e nëntë, ndërsa i ka gjashtë fitore. Jalen Tate ishte më i miri te Peja. Ai ndeshjen e përfundoi me 17 pikë e katër asistime. Brad Waldow kontribuoi me 11 pikë e 11 kërcime, ndërsa Samir Zekiqi shtoi 15 pikë e nëntë kërcime. Më efikasi ishte Purvis me 20 pikë, kurse i kishte edhe pesë kërcime e gjashtë asistime. Ndërsa Isiah Umipig i kishte 17 pikë.
Ponte Prizrenit i mungoi Urim Zenelaj, ndërsa më i miri ishte Wayne Arnold me 31 pikë e tri kërcime. Dachon Burke i shënoi 23 pikë, ndërsa Leondre Washington i kishte 15 pikë e pesë kërcime. Ponte po vuan nga mungesa e fondit më të pasur të lojtarëve vendorë. Peja udhëheq në tabelë me 27 pikë.
Edhe
Bashkimi fiton ndeshjen dramatike me Pejën, Shorter vendimtar
Ponte mbetet në pjesën e poshtme të tabelës me 21 pikë.
Xhiroja e 16-të e Superligës së Kosovës në basketboll vazhdon të mërkurën me ndeshjen Golden Eagle Ylli – Sigal Prishtina (18:00). Të enjten janë ndeshjet Vëllaznimi – Rahoveci (19:00) dhe Trepça – Bashkimi (19:00).
