Federata e Futbollit të Kosovës (FFK), të premten ka paraqitur ankesë në FIFA për veprimin, siç e ka quajtur, agresiv të Serbisë në ndeshjen e parë të Kupës së Botës.
Në duelin kundër Brazilit, thuhet se Serbia ka vazhduar me “retorikën shoviniste ndaj Republikës së Kosovës”.
Para duelit me Brazilin, të cilin e humbi 2:0, në zhveshtoren e Serbisë është vendosur një flamur, ku shihej harta e Kosovës me ngjyrat e flamurit serb dhe mbishkrimin “Nuk ka dorëzim”.
“Akte të tilla të shoviniste nuk kanë vend në një ngjarje sportive, e aq më pak brenda objekteve ku zhvillohet ngjarja më e madhe e futbollit botëror, prandaj FFK si anëtare e barabartë me të gjitha anëtaret e tjera të FIFA-s, kërkon nga ky institucion që të ndërmarrë masa sanksionuese ndaj veprimeve që nxisin urrejtje mes popujve dhe janë kundër vlerave njerëzore”, thuhet ndër të tjera në njoftimin e FFK-së.
Sipas FFK-së, futbolli si sporti më i popullarizuar në botë, përçon vlera bashkimi dhe jo përçarjeje, ndërsa ka shtuar se akti agresiv i Serbisë nuk përkon me vlerat e tilla dhe duhet të ndëshkohet.
“Kosova është shtet i pavarur dhe demokratik, me respektim maksimal të drejtave të njeriut dhe i pranuar nga shtetet më të fuqishme botërore dhe si e tillë do ta vazhdojë rrugëtimin e saj, pa marrë parasysh provokimet si ky i fundit. Mirëpo, është e papranueshme që ky akt të kalojë në heshtje, prandaj kërkojmë fuqishëm që FIFA të zbatojë në përpikëri rregullat e saj dhe të ndëshkojë Federatën e Futbollit të Serbisë për këtë veprim agresiv dhe kundër vlerave që i përçon futbolli”, ka shkruar FFK-ja.
Edhe KOK-u ankohet për veprimin e Serbisë në Botëror
Pas Federatës së Futbollit të Kosovës (FFK), edhe Komiteti Olimpik i Kosovës (KOK) është ankuar ndaj veprimit të ulët të Serbisë në Kupën e Botës “Katari 2022”.
Në njoftimin e KOK-ut, të premten, thuhet se ankesa është dërguar në Komitetin Olimpik Ndërkombëtar (IOC) dhe FIFA.
KOK-u, ka thënë se e ka pritur me shqetësim të madh veprimin e radhës nga Serbia, i cili këtë herë nuk ka ardhur nga tifozët por përfaqësuesja e futbollit dhe atë në Kampionatin Botëror që po luhet në Katar.
“Është e turpshme se si udhëheqësit e Federatës së Futbollit të Serbisë lejuan të shfaqin mesazhe të tilla urrejtje ksenofobike dhe gjenocidale ndaj një shteti me të drejta të barabarta në Komitetin Olimpik Ndërkombëtar (IOC) dhe FIFA e UEFA”, thuhet në njoftimin e KOK-ut.
KOK-u ka shtuar se në koordinim me FFK-në, tashmë ka dërguar ankesën dhe pret reagimin e IOC-së dhe FIFA-s.
“Komiteti Olimpik i Kosovës në koordinim të plotë me Federatën e Futbollit të Kosovës, ka dërguar sot ankesën në Komitetin Olimpik Ndërkombëtar, anëtare e së cilës është, por edhe në FIFA, anëtare e së cilës është FFK, në mënyrë që të dyja të marrin veprime të menjëhershme ndaj Federatës së Futbollit të Serbisë, konform kartës olimpike dhe rregullave të FIFA-s”, ka shkruar në njoftim.
