Mesfushori i Zvicrës, Edmilson Fernandes, thotë se duhet të jenë më të mirë në fazën e sulmit për ta fituar ndeshjen ndaj Serbisë të premten. Zvicra humbi ndeshjen e dytë nga Brazili, që do të thotë se kanë nevojë për një fitore për ta siguruar kalimin në fazën nokaut të Kupës së Botës. Zviceranët nuk arritën të kenë asnjë goditje të vetme në portë kundër brazilianëve dhe Fernandes thotë se do të nevojitet përmirësim i qartë ndaj Serbisë.
“Ne e humbëm golin, por do të punojmë shumë për të bërë më mirë të premten kundër Serbisë. Unë jam gati. Jam gati të luaj përpara dhe prapa. Jam gati të luaj kudo. Unë mendoj se ne mund të bëjmë më mirë në sulm, të kemi më shumë raste për të shënuar gola”, ka thënë Fernandes të martën.
Zvicra do të përballet me Serbinë më 2 dhjetor në stadiumin 974 në Doha.
Zvicra mbështetet shumë te Xherdan Shaqiri në fazën e sulmit. Ai mungoi ndaj Brazilit për shkak të një shqetësimi në kofshë.
