Përballje interesante do të ketë në serinë çerekfinale të Kupës së Kosovës në basketboll. Federata e Basketbollit të Kosovës (FBK), të mërkurën ka njoftuar për tërheqjen e shortit.
Dueli më interesant i çerekfinales të Kupës së Kosovës, do të jetë ai ndërmjet Pejës dhe Sigal Prishtinës. Po ashtu, spikat edhe dueli mes rivalëve të qytetit të Prizrenit, skuadrave Prizreni-16 dhe Bashkimi.
Trepça do të përballet me Rahovecin ndërsa Golden Eagle Ylli do të luajë kundër skuadrës së Dritës. Ndeshjet çerekfinale do të luhen më 9/10 shkurt të vitit të ardhshëm kurse turneu i Kupës së Kosovës do të zgjasë deri më 13 shkurt.
Në gjysmëfinale, fituesi i duelit Ylli – Drita do të përballet me atë të ndeshjes mes Prizrenit-16 dhe Bashkimit. Ndërsa, në gjysmëfinalen tjetër do të jenë fituesit e çerekfinaleve Trepça – Rahoveci dhe Peja – Sigal Prishtina. Skuadra e Prishtinës është fituese në fuqi e Kupës së Kosovës.
