Edicioni i 50-të i ceremonisë shpërblyese “American Music Awards” zuri vend të dielën mbrëma në teatrin “Microsoft” në Los Angeles.
Shou i organizuar nga produksioni “Dick Clark” dhe kanali televiziv ABC, u drejtua nga komediani Wayne Brady, shkruan CNN.
Ngjarja e mbushur me yje të muzikës i nderoi disa prej projekteve, performancave dhe artistëve të preferuar, sipas votave të publikut.
Artisti nga Puerto Rico, Bad Bunny, e kryesonte listën e të nominuarve sivjet me tetë nominime gjithsej. Por, ai përfundoi duke u shpërblyer në vetëm dy kategori, “Artisti i preferuar latin” dhe “Albumi më i mirë i muzikës latine”, për incizimin e tij të fundit, “Un Verano Sin Ti”.
Sidoqoftë, mbrëmja i takoi këngëtares amerikane, Taylor Swift, e cila triumfoi të gjashtë kategoritë ku ishte nominuar, përfshirë këtu çmimin kryesor të natës, “Artisti i vitit”. Këto fitore ia vulosën titullin e artistes më të dekoruar në historinë e ceremonisë “AMA”, me 40 shpërblime gjithsej në karrierën e saj muzikore.
Ndër yjet e tjerë të shpërblyer gjatë së dielës ishin, Harry Styles, i cili u nderua në kategorinë “Kënga e preferuar pop”, Dove Cameron e rrëmbeu çmimin “Artistja më e mirë e re”, Kendrick Lamar dhe Nicki Minaj u shpallën “Artisti dhe artistja e preferuar e muzikës hip-hop”, Chris Brown dhe Beyonce u nderuan në kategoritë “Artisti dhe artistja më e mirë R&B”, Machine Gun Kelly u nderua me çmimin “Artisti i preferuar i muzikës rok”, grupi italian “Maneskin” e rrëmbeu shpërblimin “Kënga më e mirë rok” për hitin e tyre “Beggin”, grupi nga Korea Jugore “BTS” triumfoi në dy kategori, “Grupi më i mirë pop” dhe “Grupi më i mirë K-pop”, Anita u shpall “Artistja e preferuar latine” dhe Elton John dhe Dua Lipa u nderuan me çmimin “Bashkëpunimi më i mirë”, për këngën e tyre shumë të pëlqyer nga publiku “Cold Heart”. Ky ishte shpërblimi i parë “AMA” për Elton Johnin, nga viti 1998.
Edhe
Dua Lipa triumfoi në dy kategori të ceremonisë “Billboard Music Awards”
Ceremonia u pasurua me performancat e yjeve në skenë të tillë si: Pink, e cila e hapi shoun, Dove Cameron, Lil Baby, Bebe Rexha, Cardi B, Carrie Underwood, grupi “Imagine Dragons” dhe të tjerë.
Lionel Richie, fitues i 17-të çmimeve “AMA” gjatë karrierës së tij disa dekadëshe, u nderua me shpërblimin special “Icone Aëard” për kontributin e jashtëzakonshëm në muzikë.
