Shoku i Amy Winehouse rikthen në ankand sendet e këngëtares

Shoku i ngushtë i Amy Winehouse, Tyler, ka vendosur të rikthejë në ankand disa nga sendet personale të këngëtares së ndjerë, pasi më parë e kishte pezulluar shitjen për shkak të kundërshtimeve ligjore nga babai i Amyt, Mitch. Mes sendeve që pritet të shiten janë edhe tekste këngësh të shkruara me dorë dhe një këmishë e kuqe bowlingu.

Tyler ka treguar se e kishte përjetuar shumë rëndë situatën, duke thënë se kishte mbështetur Amyn gjatë viteve të saj të vështira me varësinë nga droga dhe vetëlëndimin. Ai theksoi se lidhja e tyre ishte shumë më e rëndësishme se sendet materiale dhe se gjithmonë kishte dashur ta mbronte këngëtaren.

Mitch Winehouse, i cili administron pasurinë e vajzës së tij që prej vdekjes së saj në vitin 2011, kishte kundërshtuar edhe shitjen e sendeve të Amyt nga dy shoqe të saj, Naomi Parry dhe Catriona Gourlay. Ai i kishte akuzuar ato se po përfitonin financiarisht nga sendet personale të këngëtares.

Megjithatë, Mitch humbi çështjen gjyqësore dhe gjykata vendosi se ai kishte qenë në dijeni për shitjen e sendeve. Gjykatësja kritikoi ashpër mënyrën se si ai e kishte ndjekur çështjen, duke thënë se kishte bërë akuza të pabazuara që u kishin dëmtuar grave reputacionin, karrierën, sigurinë financiare dhe shëndetin.

Gjykata urdhëroi gjithashtu Mitchin të paguante shpenzimet ligjore të dy grave, të cilat arrijnë në qindra mijëra paund. Gjykatësja e konsideroi veçanërisht serioze faktin që ato ishin dy gra të reja që kishin qëndruar pranë Amyt dhe familjes së saj për shumë vite.

Pas këtij zhvillimi, Tyler është shprehur i kënaqur dhe ka thënë se do të kontaktojë Sotheby’s për të vazhduar me ankandin e sendeve që zotëron. Ai theksoi se, pavarësisht gjithçkaje, asgjë nuk mund të zbehë kujtimet dhe lidhjen që kishte me Amyn.