Selena dhe Hailey pozojnë të përqafuara me njëra-tjetrën

Selena Gomez dhe Hailey Bieber e pushtuan internetin gjatë fundjavës. Ato ishin në mesin e të ftuarve të Muzeut të Akademisë, për edicionin e dytë të gala mbrëmjes së tyre të përvitshme.

Këngëtarja dhe modelja shpesh janë pjesë e mediave për shkak të lidhjes së tyre me pop yllin, Justin Bieber, i cili ishte në lidhjen romantike me Selenan për disa vjet, para se të martohej me Haileyn.

Dy yjet e showbizit duket se dëshirojnë t’i lënë anash thashethemet rreth një konflikti të mundshëm mes tyre, kjo pasi vendosën t’ua vërtetojnë të gjithëve të kundërtën dhe pozuan përkrahë njëra-tjetrës për herë të parë në këtë gala mbrëmje.

Fotografitë u shkrepën nga fotografi, Tyrell Hampton, i cili më pas i shpërndau ato në Instagram.

{gallery}

Imazhet vijnë vetëm disa javë pasi e gjithë saga u rishfaq gjatë një interviste të Hailey Bieberit për podcastin, “Call Her Daddy”. Biseda e hapur dhe e sinqertë e modeles rreth kësaj teme, kishte për qëllim që, më në fund, njerëzit ta dinin të vërtetën rreth asaj që kishte ndodhur, duke ua ofruar fansave mundësinë që ta dëgjojnë anën e saj të historisë. Kështu, ajo tregoi për herë të parë nëse e kishte vjedhur Justinin nga Selena.

“Jo, kjo nuk ka ndodhur kurrë. Kur unë dhe Justin e filluam lidhjen, ai ishte beqar. Nuk është në natyrën time të përfshihem me persona që janë në lidhje me dikë tjetër. Jam rritur më mirë se kaq. E kuptoj si mund të jetë dukur e gjithë situata nga syri i publikut, por unë e di me fakte që për Justinin dhe Selenan, ajo ishte koha e duhur për t’i dhënë fund asaj lidhjeje. Por, sigurisht se ata kishin histori të gjatë së bashku dhe unë e respektojë shumë këtë gjë”.

Tutje, Hailey deklaroi: “Kjo është një çmenduri, unë kurrë më herët nuk ka folur për këtë temë. Një pjesë e madhe e paragjykimeve dhe urrejtjes vijnë nga mendimi i njerëzve që unë e kam vjedhur Justinin nga ajo”.

Modelja 25-vjeçare po ashtu tregoi se ka komunikuar me Selenën pas martesës me Justinin, dhe mes tyre nuk ka drama.

Pas publikimit të podcastit në fund të muajit shtator, Gomez e realizoi një videolidhje në TikTok ku ndër të tjera e komentoi përgjigjen e fansave ndaj trekëndëshit të mëparshëm të dashurisë, duke thënë: “Disa nga gjërat për të cilat as nuk kam nevojë t’i di, janë thjesht të neveritshme dhe të ulëta. Nuk është e drejtë dhe askujt nuk duhet folur kurrë në mënyrën që kam parë unë.”

Ajo në fund u kërkoi ndjekësve të saj që të jenë më të sjellshëm.

Pop-ylli kanadez, Justin Bieber, rinia e së cilit karakterizohet me skandale, varësi nga droga, arrestime për vozitje në gjendje të dehur dhe vandalizëm, e filloi lidhjen romantike me këngëtaren dhe aktoren Selena Gomez në vitin 2010, kur ata ishin rreth moshës 16 dhe 18 vjeç. Lidhja e tyre, megjithëse jostabile, zgjati deri në mars të vitit 2018. Gjashtë muaj më vonë, Bieber u martua me modelen Hailey Baldwin.