Reperi i njohur Jay-Z ka folur me shumë vlerësim për bashkëshorten e tij, Beyonce, duke pranuar se në fillimet e lidhjes së tyre ishte më i papjekur dhe kishte frikë të shfaqte ndjenjat.
Jay-Z, 56 vjeç, dhe Beyonce nisën lidhjen në fillim të viteve 2000, ndërsa u martuan në vitin 2008. Sipas reperit, marrëdhënia me këngëtaren e ka ndihmuar të bëhet më i hapur dhe më i shprehshëm emocionalisht.
Duke folur për këngën “4:44”, në të cilën ai trajton tema si marrëdhëniet, tradhtia dhe atësia, Jay-Z tha se e kishte të vështirë ta dëgjonte këngën pasi e kishte përfunduar.
Në një pjesë të këngës, reperi reflekton për fillimet e marrëdhënies me Beyoncé dhe pranon se ajo ishte pjekur më shpejt se ai.
Jay-Z tani ka pranuar se, pavarësisht diferencës së moshës prej 12 vjetësh, ishte ai që ndihej më i papjekur në atë periudhë.
“Isha shumë i papjekur dhe aq i frikësuar”, ka rrëfyer ai, duke shpjeguar se nuk dinte si ta kalonte marrëdhënien nga miqësia dhe bisedat telefonike në një lidhje romantike.
Edhe
Jay-Z flet për herë të parë për padinë për sulm seksual
Sipas tij, në vend që t’i kërkonte drejtpërdrejt Beyonces të bëheshin çift, ai i tha: “Mos më turpëro”, duke e përdorur këtë si një mënyrë për të shprehur ndjenjat pa u ekspozuar emocionalisht.
Ndërkohë, Jay-Z ka folur edhe për ndikimin që Beyonce vazhdon të ketë tek ai. Reperi ka thënë se ndihet “jashtëzakonisht i frymëzuar” prej saj dhe e ka cilësuar atë si një artiste të jashtëzakonshme dhe një person “të patrembur”.
Ai ka vlerësuar veçanërisht gatishmërinë e saj për të provuar gjëra të reja në muzikë, duke thënë se ndërsa ai ndonjëherë bëhet shumë i vetëdijshëm për veten, Beyonce thjesht eksperimenton dhe ndjek atë që ndien në moment.
