Ylli amerikan, Beyonce ka hyrë në një grup elitar artistësh me pasuri dhjetëshifrore, raporton Forbes, ku përfshihen edhe Taylor Swift, Rihanna, Bruce Springsteen dhe bashkëshorti i saj Jay-Z, për të cilin revista e biznesit vlerëson një pasuri neto prej 2.5 miliardë dollarësh (1.85 miliardë paund).
Më herët gjatë këtij muaji, Forbes kishte vlerësuar pasurinë neto të Beyonces në 800 milionë dollarë (593 milionë paund) dhe kishte parashikuar se ajo do ta kalonte për herë të parë pragun e miliarderes pas vitesh suksesi.
Turneu botëror “Renaissance World Tour” i vitit 2023 arkëtoi gati 600 milionë dollarë, duke e renditur Beyoncen ndër ikonat më të mëdha të muzikës pop në botë, përkrah Taylor Swift.
Artistja prodhoi gjithashtu një film nga performanca e koncertit, që ishte turneu i saj i parë solo pas shtatë vitesh, dhe e shpërndau drejtpërdrejt përmes një marrëveshjeje me zinxhirin e kinemave AMC, duke përfituar rreth gjysmën e të ardhurave globale prej 44 milionë dollarësh (33 milionë paund).
Albumi i saj i vitit 2024, Cowboy Carter, i cili feston dhe vendos në kontekst rrënjët afrikano-amerikane të muzikës country, u prit me vlerësime shumë pozitive nga kritika dhe fitoi çmimin për albumin e vitit në “Grammy Awards”. Ishte hera e parë që Beyonce fitonte këtë çmim prestigjioz, ndonëse ishte nominuar katër herë më parë.
Forbes vlerëson se turneu “Cowboy Carter” – ku morën pjesë si mysafirë Jay-Z, dy nga tre fëmijët e tyre dhe ish-anëtare të grupit Destiny’s Child – gjeneroi mbi 400 milionë dollarë nga shitja e biletave dhe rreth 50 milionë dollarë të tjerë nga shitja e produkteve gjatë koncerteve.
Edhe pse turneu theu rekorde shitjeje biletash në stadiumin “Tottenham Hotspur” në Londër dhe në “Stade de France” në Paris, ai u përball edhe me ritme të ngadalta shitjeje në disa tregje, duke detyruar organizatorët të ulin çmimet për të mbushur vendet.
Megjithatë, bileta më e shtrenjtë për një artist që vizitoi Mbretërinë e Bashkuar në vitin 2025 ishte pikërisht e këtij turneu, me çmim prej 950 paundësh, ndërsa bileta më e lirë kushtonte 71 paundë.