Disa nga gratë më të suksesshme shndërrohen në “Barbie” për 8 Mars

Gjigandi i lodrave “Mattel” me kukullën e famshme “Barbie” po shënon Ditën Ndërkombëtare të Grave me “Barbie Dream Team”, një grup kukullash unike që përfaqësojnë gra të suksesshme nga e gjithë bota.

Lajmin e kanë bërë të ditur përfaqësuesit nga departamenti i “Barbiet” dhe kanë thënë se kur vajzat kanë qasje në shembuj grash të suksesshme mund të zgjerojnë imagjinatën e tyre për të ardhmen.

Që nga debutimi në vitin 1959, “Barbie” ka shfaqur më shumë se 100 gra nga industri dhe komunitete të ndryshme që kanë sjellë ndryshim të rëndësishëm.

“Barbie Dream Team” i këtij viti nderon gra që ishin ndër të parat në fushat e tyre, përfshirë:

Serena Williams (SHBA): Legjendë e tenisit me 23 tituj Grand Slam, sipërmarrëse dhe ikonë globale.

Kellie Gerardi (SHBA): Astronaute.

Regina Sirvent Alvarado (Meksikë): Vozitëse profesioniste garash, figurë kryesore e motorsportit në Meksikë.

Chloe Kelly (MB): Futbolliste profesioniste dhe një nga figurat më të rëndësishme të futbollit modern të grave.

Helene Fischer (Gjermani): Një nga artistet më të njohura të muzikës pop në Gjermani.

Zoja Skubis (Poloni): Gruaja më e re polake që ka ngjitur majat Manaslu (8,163 m) dhe Everest (8,849 m).

Stephanie Gilmore (Australi): Surfiste profesioniste dhe gruaja e parë që fitoi tetë tituj të Botës në Surf (WSL).

Smriti Mandhana (Indi): E para grua indiane që shënoi një shekull në të tre format e kriketit (T20, Test dhe ODI).

“’Barbie’ gjithmonë ka mbështetur besimin se vajzat mund të jenë gjithçka. Nga astronautet tek CEO-të, ‘Barbie’ ka thyer barriera dhe ka zgjeruar mundësitë, duke frymëzuar gjenerata vajzash të ëndërrojnë pa kufij. Këtë Ditë Ndërkombëtare të Grave, ne jemi krenarë të prezantojmë ‘Barbie Dream Team’, duke nderuar një grup të jashtëzakonshëm grash që po hapin rrugën për gjeneratën tjetër”, ka thënë Nathan Baynard, zëvendëspresident dhe drejtor i Departamentit të kukullave ‘Barbie’, në korporatën “Mattel”.

Serena Williams ka thënë se është e emocionuar dhe e nderuar t’i bashkohet këtij grupi grash.

“Jam e emocionuar të nderohem bashkë me këtë grup të jashtëzakonshëm të grave që ndryshojnë botën. Ashtu si shumë gra më kanë ndihmuar të kthej frikën në guxim dhe dyshimin në vetëbesim, shpresoj që të frymëzojmë vajzat kudo të kapin raketën, të bëhen sipërmarrëse ose të ndjekin pasionin e tyre”, ka thënë ajo.

Kellie Gerardi ka thënë se është po ashtu e ngazëllyer t’i bashkohet grupit e të shpërndajë njohuritë që ka për shkencën.

“Jam e ngazëllyer të bashkohem me ‘Barbie Dream Team’ për të treguar se shkenca dhe hapësira janë për të gjithë. Është misioni im të hap derën për vajzat që të ndjekin ëndrrat e tyre, sepse kur guxon të largohesh nga zona e rehatisë dhe ëndërron shumë, as qielli nuk është kufi”, ka thënë ajo.

Për të festuar ëndrrat e fansave, “Barbie” ofron “Barbie Dream Days” me oferta të veçanta në dyqanet kryesore në SHBA nga 8 deri më 15 mars.

Gjithashtu, “Barbie” po nxjerr në pah partneritete me gjashtë brende të themeluara nga gra në fushën e bukurisë, modës dhe pijeve, “FHI Heat”, “Stoney Clover Lane”, “GK”, “Unique Vintage”, “Besita Boots” dhe “Moment”.

Koleksione të veçanta përfshijnë kukulla dhe aksesorë “Barbie” me “Besita Boots”, veshje të modës “vintage” me “Unique Vintage”, vegla për stilimin e flokëve nga “FHI Heat”, pije botanike nga “Moment” dhe koleksione veshjesh nga “Stoney Clover Lane” dhe “GK Elite”.

“Barbie Dream Fest”, festivali i parë i dedikuar plotësisht kukullës “Barbie”, do të mbahet nga 27 deri më 29 mars në Fort Lauderdale, me folëse inspiruese si Serena Williams, Angel Reese dhe Dr. Swati Mohan.

Fansat do të përjetojnë eksperienca të veçanta dhe momente të paharrueshme që eksplorojnë trashëgiminë dhe imagjinatën e pakufishme të brendit “Barbie”.

“Mattel” është një kompani globale e lojërave dhe argëtimit familjar, pronare e disa prej markave më ikonike botërore, përfshirë “Barbie®”, “Hot Wheels®”, “Fisher-Price®” dhe shumë të tjera.

Që nga themelimi në 1945, “Mattel” frymëzon gjenerata për të eksploruar mrekullitë e fëmijërisë dhe për të arritur potencialin e tyre të plotë.