Shtetet e Bashkuara të Amerikës kanë nisur zbatimin e sanksioneve kundër industrisë së naftës së Serbisë, NIS. Lajm jashtëzakonisht të keq e ka quajtur presidenti serb, Aleksandar Vuçiq.
NIS-i njoftoi në një komunikatë lidhur me sanksionet se "prioritetet, si më parë, mbeten furnizimi i rregullt i tregut vendas me produkte nafte, si dhe ruajtja e stabilitetit social të punonjësve".
"NIS-i ka siguruar furnizime të mjaftueshme me naftë për përpunim në këtë kohë, ndërsa pompat e karburanteve furnizohen rregullisht me të gjitha llojet e produkteve të naftës", thuhej në njoftim.
Shtetet e Bashkuara e vendosën NIS-in në listën e sanksioneve më 10 janar për shkak të pjesëmarrjes në pronësi të kompanisë ruse, Gazprom Neft, me qëllim të parandalimit të Rusisë që të përdorë të ardhurat nga sektori energjetik për luftën në Ukrainë.
“Që nga ora 6 e mëngjesit, Shtetet e Bashkuara kanë vendosur sanksione, më saktë – kanë hyrë në fuqi sanksionet ndaj kompanisë NIS. Ky është një lajm i keq për vendin tonë", deklaroi presidenti i Serbisë, Aleksandar Vuçiq.
"Ky lajm është shumëdimensionalisht i keq për Serbinë – nuk bëhet fjalë vetëm për funksionimin e një kompanie. Pasojat do të jenë jashtëzakonisht të rënda për vendin tonë në aspektin politik, ekonomik, social dhe çdo aspekt tjetër. Nuk është diçka e drejtuar kundër një individi, kjo do të prekë çdo qytetar të vendit tonë, dhe për këtë arsye duhet të jemi të bashkuar", tha Vuçiq.
"NIS-i është privatizuar në vitin 2008, kur disa njerëz vendosën se u duheshin para në dorë. Ndërkohë kemi fituar një partner rus që ka qenë i besueshëm, dhe që atëherë mbushte buxhetin me rreth 15 për qind, ndërsa sot me rreth 9 për qind. Ne kemi zhvilluar dhe do të vazhdojmë të zhvillojmë bisedime me partnerët amerikanë, dhe sot në mëngjes kam biseduar edhe me ambasadorin rus. Presim gjithashtu edhe reagimin e Moskës", përfundoi Vuçiq.
Ai ka njoftuar se kroatët që ditën e parë të sanksioneve njoftuan ndërprerjen e furnizimit me naftë.
"JANAF ndalon furnizimin me naftë”, deklaroi presidenti serb Aleksandar Vuçiq.
“Vlerësimi real është që rafineria, pa burime shtesë të naftës, mund të funksionojë deri më 1 nëntor”, theksoi ai. “Pas asaj date, do të fillojnë problemet me derivatet e naftës. Por kemi rezerva të mjaftueshme dhe qytetarët nuk duhet të jenë në panik. Në rezerva kemi 34 mijë tonë dizel, mbi 66 mijë tonë benzinë, dhe sa i përket mazutit, në sistemin energjetik kemi rezerva për një vit – që është jashtëzakonisht e rëndësishme. Do të sigurojmë mazut të mjaftueshëm edhe për ngrohtoret. Për sa i përket derivateve të naftës, kemi mjaftueshëm në rezervat tona – të gjitha depozitat janë të mbushura. Por, sapo të fillojmë t’i konsumojmë, do të duhet të shohim se si do të transportojmë naftën dhe si do të importojmë derivatet. Kam arritur të krijoj lidhje personale nëpër botë, për të sjellë sasi të mëdha nafte nëpër porte, por do të duhet të bisedojmë me aksionarët nëse mund të përpunojnë këtë naftë apo jo", u shpreh ai.