Presidenti i Serbisë, Aleksandar Vuçiq, ka njoftuar se nga e marta rafineria e Industrisë së Naftës së Serbisë (NIS) në Pançevë nuk do të funksionojë më. Vuçiq po ashtu shtoi se Serbisë do t’i duhet të gjejë “mënyra për të menaxhuar situatën”.
Tutje presidenti serb deklaroi se do të përpiqet të zhvillojë bisedime shtesë me përfaqësues amerikanë, por u shpreh pesimist se do të ndërrojë diçka në këtë drejtim dhe si rrjedhojë rafineria duhet të mbyllet të martën, raporton Beta.
Presidenti serb paraprakisht tha për një televizion serb se “nuk e kupton logjikën dhe taktikën” e SHBA-së se pse kësaj kompanie nuk po i zgjatet leja punës, pavarësisht se shteti serb ka dhënë garanci se deri në afatin e vendosur nga SHBA-ja do të ndryshohet pronësia në atë kompani, e cila është nën sanksionet amerikane për shkak të pronësisë ruse.
“Nuk mund ta kuptoj çfarë është ajo që amerikanët po bëjnë tani, po ua them hapur, nuk e kuptoj logjikën e tyre”, deklaroi Vuçiq për TV Informer.
Vuçiq tha se i kanë bërë me dije SHBA-së se i respektojnë sanksionet e tyre dhe se është e nevojshme që të ndryshohet pronësia e NIS-it, por se kjo do të ndodhë brenda 50 ditësh, për çka tha se i ka dhënë garanci, por ai ka cituar SHBA-në që këto sanksione i kanë paralajmëruar që para tetë apo nëntë muajsh.
Vuçiq përsëriti se Serbia nuk është pronarja kryesore e kompanisë dhe se ajo nuk mund të vendosë në emër të rusëve se çfarë do të bëjë me të.
Sipas presidenti serb, Vuçiq, presidenti amerikan, Donald Trump, nuk i di detajet por se ato i dinë shumë zyrtarë të lartë në Departamentin e Shtetit dhe se kjo dukshëm është politika që ata mbështesin.
Udhëheqësi serb tha se ishte përpjekur dhe ishte i sigurt se amerikanët do të merrnin një vendim pozitiv pas Ditës së Falënderimeve, por kjo nuk ndodhi, dhe tani nuk ka pritshmëri më për këtë.
“Tani duhet të përgatitemi dhe të bëjmë punën tonë, për të siguruar vendin. Këtu do të na tërheqin të gjithë dhe do të kërkojnë që të jemi në kampin e tyre, askush nuk do të na lejojë të jemi neutralë dhe të merremi me punët tona”, tha Vuçiq.
Ai përmendi gjithashtu se Serbia ka një marrëveshje për gaz me Rusinë deri më 1 janar dhe se do të përpiqet të diskutojë edhe një herë për zgjatjen e saj me rusët “dhe nëse kjo nuk bëhet, do të shkojmë te të tjerët”.
“Ne do të luftojmë dhe do të përpiqemi të ruajmë aty ku mund marrëdhënie miqësore, dhe aty ku mundet, marrëdhënie partneriteti”, theksoi ai.
Sanksionet amerikane ndaj NIS-it kanë hyrë në fuqi më 9 tetor si përpjekje e SHBA-së për ta penguar Rusinë që të përdorë të ardhurat nga energjia për luftën në Ukrainë.
Këto sanksione janë shtyrë për tetë herë më parë.
NIS është kryesisht në pronësinë e kompanive ruse, ndërsa Serbia ka 29.87 për qind të aksioneve. Prej shumë vitesh, Serbia varet nga gazi rus prej nga furnizohet për më shumë se 80 për qind për nevojat e saj energjetike. Pavarësisht kësaj, Serbia nuk ka kontratë afatgjatë me Rusinë për furnizim me gaz.