Për pacientët me kancer, efektet anësore të ashpra të barnave me doza të larta kanë qenë prej kohësh kompensimi për të jetuar më gjatë.Tani, pacientët dhe mjekët po pyesin nëse gjithë ajo vuajtje është e nevojshme. Ata kanë formuar një lëvizje në Shtetet e Bashkuara për të ndryshuar rrënjësisht mënyrën e testimit të ilaçeve të reja kundër kancerit, me Administratën e Ushqimit dhe Barnave (FDA) të SHBA-së, që u kërkon prodhuesve të barnave të bëjnë një punë më të mirë për të gjetur dozën më të ulët efektive, edhe nëse kërkon më shumë kohë.
Derisa priten përparimet në trajtim, miliona njerëz po mbijetojnë për vite me kancer të pashërueshëm.
Jill Feldman, 54 vjeçe, nga Deerfield, Illinois, ka jetuar për 15 vjet me kancer në mushkëri, falë këtij përparimi.
Të dy prindërit e saj vdiqën nga kanceri i mushkërive muaj pas diagnostikimit.
Por, ilaçi që tani Feldman e përdor kundër kancerit shkakton dhimbje kyçesh, lodhje dhe plagë në gojë, që e bëjnë të dhimbshme ngrënien dhe pirjen.
“Kisha plagë në gojë dhe në fyt. Kisha çarje në gishta dhe në këmbë”, thotë Feldman. “Lodhja ishte e keqe”.
Ajo e ka ulur dozën me rekomandimin e mjekut të saj, por dëshiron që prodhuesit e barnave të vazhdojnë studimin e dozave më të ulëta për fillimin e trajtimit.
Ndryshe nga sëmundjet e tjera, zhvillimi i ilaçeve për kancerin është fokusuar në gjetjen e asaj që quhet “doza maksimale e toleruar”.
Për të shpejtuar testimin e barnave të kimioterapisë, studiuesit rritin dozën në disa njerëz në studimet e hershme, për të përcaktuar dozën më të lartë të mundshme që pacientët mund të tolerojnë.
Filozofia e “sa më shumë aq më mirë” funksionon për kimioterapinë, por jo domosdoshmërisht për ilaçet më të reja të kancerit - si ato që merr Feldman - të cilat janë targetuar për studim dhe që funksionojnë ndryshe.
Doktori Timothy Yap, zhvillues i barnave në Qendrën e Kancerit MD Anderson në Hjuston, ka folur në lidhje me ilaçet.
“Ne po përpiqemi të largohemi nga një qasje e vetme për të gjithë në onkologji, ku na janë dhënë ilaçe kimioterapie, të cilat mund të jenë efektive në lloje të caktuara të tumorit, por nuk do të thotë se janë të përshtatshme për një pacient individual”, ka theksuar ai.
Nëpërmjet një programi të quajtur Project Optimus, FDA-ja po i shtyn prodhuesit amerikanë të barnave që të përfshijnë më shumë pacientë në provat e hershme të gjetjes së dozës së duhur, për të marrë të dhëna më të mira se kur mund të funksionojnë dozat më të ulëta.
Shumë nga ilaçet e reja kundër kancerit u zhvilluan duke përdorur strategjinë e vjetër.
Kjo çon në probleme kur pacientët anashkalojnë dozat ose ndalojnë marrjen e barnave për shkak të efekteve anësore.
Disa rekomandime të dozës janë ulur zyrtarisht pas miratimit të barnave.
Sipas një studimi, gati gjysma e pacientëve në provat e fazës së vonë të 28 barnave të terapisë së synuar duhej të ulnin dozat e tyre.
