Rreziku për gurët në veshka rritet gjatë valëve të të nxehtit

Rritja e temperaturave globale po lidhet gjithnjë e më shumë me shtimin e rasteve të gurëve në veshka, një gjendje shumë e dhimbshme që mund të përkeqësohet gjatë motit të nxehtë, ka shkruar The Washington Post.

Në pjesën lindore të SHBA-së, ku këtë javë janë regjistruar temperatura rekord për shkak të një “kupole nxehtësie”, ekspertët paralajmërojnë se rreziku për dehidrim dhe probleme shëndetësore është më i lartë.

Mjekët theksojnë se nxehtësia e lartë çon në humbje të lëngjeve dhe dehidrim, gjë që e bën urinën më të përqendruar me minerale. Këto minerale mund të kristalizohen dhe të formojnë gurë në veshka.

Studime të ndryshme kanë treguar se ekziston një lidhje e drejtpërdrejtë mes temperaturave të larta dhe rritjes së diagnozave për gurë në veshka.

Rajonet juglindore të SHBA-së madje njihen si “Stone Belt”, për shkak të numrit më të madh të rasteve krahasuar me pjesën tjetër të vendit.

Ani pse formimi i gurëve në veshka ndikohet nga disa faktorë, sipas ekspertëve, klima po bëhet një element gjithnjë e më i rëndësishëm. Ndryshimet klimatike pritet ta rrisin këtë problem në vitet e ardhshme.

Sipas disa parashikimeve, deri në vitin 2050 rreth 56 për qind e amerikanëve mund të jetojnë në zona me rrezik të lartë për formimin e gurëve në veshka për shkak të motit të nxehtë dhe të lagësht.

Ekspertët këshillojnë hidratim të vazhdueshëm gjatë ditëve me temperatura të larta për të ulur rrezikun e dehidratimit dhe formimit të gurëve.